Manipur: Iakynduh ka KIM bad Arambai Tenggol ia ki Heh MHA ban tehlakam noh ia ki kam umsnam

Imphal, K’lyngkot 24 : Ka Kuki Inpi Manipur (KIM) kala pynlong ia ka jingialang bad ki nongmihkhmat na ka Ministry of Home Affairs lem bad ka Arambai Tenggol, ban iakren halor ki jingjia umsnam ba dang shu jia shen ha Manipur.

Ka kynhun ba kyrpang na ka MHA ba ialam da u AK Mishra, kala poi ha Imphal ha ka janmiet sngi Nyngkong bad mar syn hiar na liengsuin, kala kynhun ia ki nongialam ka Arambai Tenggol ha ka Iingsah u MP ka Rajya Sabha Leishemba Sanajaoba.

Ia kane ka kynhun bala khlieh da u Advisor AK Mishra, Joint Director IB Mandeep Singh Tuli, bad Joint Director SIB Imphal Rajesh Kumble, . la phah da u Myntri kam Pohiing Amit Shah tang da ki sngi hadien ba ka Arambai Tenggol kala khot ia ka jingialang jong baroh ki MLA bad MP ka jaidbynriew Meitei ha ka 24 tarik Kyllalyngkot.

Ka kynhun kala dawa ia baroh ki MLA bad MP ba ki dei ban wan khlem pep sha ka jingialang lem kumta kin mad ia ka jingialeh pyrshah haba maham ruh ba ym dei ban don uwei ruh u MLA ne MP u ban iehnohkam shuwa ka jingialangjong ka 24 tarik Kyllalyngkot.

Kane ka jingmaham kala mih halor ki khubor ha ki social media ba u Myntri Rangbah bad ki MLA ki lah ban iehnohkam.

U Nongialam ka Arambai Tenggol Korounganba Khuman hadien ka jingialang bad ka kynhun ka MHA, ula pyntip ha Facebook ba ka seng kala pynsngew ia ki jingdawa hapoh ka jingialang.

Ka jingdawa ka kynthup ia ka jingpyntreikam ia ka NRC hapoh ka Jylla ha kaba u snem 1951 u dei ban long u snem ot kyrteng, pynkut noh iaka soskular SoO bad ki kaikhlaw Kuki, pynphai noh ia ki poiwir Myanmar sha Mizoram, ker sainar ha khappud, weng ia ki shipai Assam Rifles bad bujli da kiwei pat ki bor pahara ka Sorkar Pdeng nalor ban weng noh ia ki jaidbynriew Kuki na ka thup ST.

Ka kynhun jong ka Kuki (KIM) pat kala kynnoh ba ka Arambai Tenggol kala don bad buhrieh ia palat 6000 tylli ki tiar siat ba khlain bor nalor ki kuli ba bun bah, ia kiba la ai da ka Sorkar Manipur. La kynnoh ruh ba kane ka seng kala ai jaka rieh ia ki kynhun Kaikhlaw hapoh ka shatri jong ka.

Ka KIM kala pynpaw ba kane ka jingialang ka bym shym la poi shano shano ruh kala pynartatien ia ka sienjam jong ka MHA ban lah tehlakam ia kane ka kam umsnam kaba la iaid mynta la phra bnai hapoh ka Jylla.