Assam | Tur ki Nongialam ka Congress sha ka Ophis u DGP ha Guwahati | Kynnoh ba ki Pulit ki dei ki Agent ka BJP

Guwahati, Iaiong 17: Ki nongialam ka ka Assam Pradesh Congress Committee kila sdang ka leh drama hapoh ka jingialam u President u Bhupen Borah bad MP u Pradyut Bordoloi, kila leit tur sha ka ophis u Director General of Police (DGP) ha Guwahati hynne ka sngi Palei.

Kane ka jingiakhih jong ka Congress ka long ban aiti da ka dorkhas sha u DGP ka Assam da kaba kynnoh ba ki pulit ka jylla ki ak ia lade kum ki agent jong ka Bharatiya Janata Party (BJP) kaba synshar hapoh ka jylla.

Kane ka jingleit tur kala sdang na Congress headquarters na Rajiv Bhawan, hynrei kila shah khang lynti noh ha ki bor pahara shabar jong ka DGP office. Ki nongialam ka Congress kila kam ba kila shah pynbor ban sangeh noh ha shwa ban rung ha phyllaw ban pynlong ka jingiakhih ba jai jai bad hadien ba shah khang kila pynlong noh ka jingiakhih shabar ka ophis DGP.

Haba kren sha ki lad pathai khubor u President ka APCC u Bhupen Borah u la ong, Ha kine ki 7-8 sngi kiba la leit noh ngi lah dep ong sha ki pulit ba kim dei ban long kum ki agent jong ka BJP bad ki pulit kidei ban peit ia ka shong suk shong sain bad ym dei ban don ka jingshah liang, hynrei mynta ki Pulit Assam ki byrngem ia ki nongialam ka Congress Party.

Mynta kadei ka sngi ba khatduh jong ka nomination campaign, bad ki da byrngem ia ki kyrtong kiba nud ban campaign bad mynta ngi la dep ban aiti ia ki jingshisha. Ki lad pathai khubor ki pynmih ia ka jingshisha hynrei ki pulit ki ak kum ki agent ka BJP.

Kumno ki seng sain pyrthei kin ïakhun ia ka election katba ki pulit ki trei na ka bynta jong ki hynrei ngi kwah ba kan ym don ka jingshah liang bad ngi kwah ba ki pulit ki long katkum ka riti synshar bad ruh katkum ki rule jong ka ain.

U MP u Pradyut Bordoloi u la ong, ka jingthmu ka jong ki ba ka congress kan ym don kyrtong khnang ba ka BJP kan jop suk khlem da don ba ïakhun pyrshah, hynrei ka jingshisha ka long ba ki kyrtong ka congress kila shah kidnap, shah byrngem bad la pynbor ban weng noh ia ki nomination khamtam eh ia ki kyrtong kynthei kiba shah pynbor ha police stations.

Ki nongialam ka congress kila dawa mardor ban tuklar halor kane bad kyntu ia u DGP ba dei ban pyntikna ba ki pulit kim dei ban shah liang katba ka election ka dang iaid.