Basugaon, Naiwieng 24 :Na ka liang ki kmie ki kpa bad kiba haiing hasem jong kawei ka khynnah kaba dang pule ha ka klas VII hynnin ka sngi Balang kila leit ban khynra bad thombor tyneh ia uwei u nonghikai skul hapoh Basugaon, Assam hadien ka jingkynnoh jrongkti ia kane ka khynnah.
Une u nonghikai uba la shah kynnoh donkti u dei uba la tip kyrteng kum u Deepak Bhakat uba dei u nonghikai Hindu hapoh ka skul Raja Ajit Narayan Deb Girls Mes, ha Basugaon kaba hapoh Kokrajhar ka Assam.
Katkum ki khubor la kynnoh ba une u nonghikai ula pyrshang ban jngohkai ia kane ka khynnah bad hadien ba kine ki jingleh ki jong u kila poi sha ki shkor jong ki paidbah, kumta ruh kala mih kane ka jingjia shah thombor kaba la pynkhihwin ia kane ka skul baroh kawei.
Kiba haiing hasem jong kane ka khynnah kila leit tur beit beit sha katei ka skul bad thombor tyngeh ia une u nonghikai hapoh ka kamram klas jong ka skul da kaba tied ruh da ki juti bad ki slipar.
“Ngi la ioh ia ka jingtip ha ka por jan miet ba na ka liang kiba haiing hasem jong kawei ka khynnah skul kila wan ban pynmihwin hapoh ka skul.Kumta ruh mardor ngi la leit sha katei ka jaka ban tehlakam ia ka jinglong jingman bad ngi la ialam noh ia u nonghikai uba la shah kynnoh donkti na ka bynta ban pynlong ka jingtohkit,” pynpaw u heh pulit lyngba ki lad pathai khubor.
Shuh shuh na ka liang ki kmie ki kpa bad kiba haiing hasem jong katei ka khynnah kila tar ruh ia ka sopti jong utei u nonghikai.
Kham hadien na ka liang kiba haiing hasem jong katei ka khynnah kila wan poi ha Basugaon police station ban pynpaw pyrshah sa shisien pat bad dawa ruh ban pynsangeh kam mardor ia une u nonghikai.
