Guwahati, Naiwieng 30 : Katba ki kynrum kynram kiba iadei bad ki kam thombor (ragging) hapoh Dibrugarh University ka dang iai bteng, kawei ka nonghikai kaba dang armet san bnai ia i khun hapoh ka kpoh jong ka la ong ba ka la ngat ha ka jingshah thombor bad shah byrthen ha la ki jong ki khynnah skul kiba dang pule ha ka klas XI ha Moran hapoh Dibrugarh district ka Assam.
Katkum ki khubor la ong ba kane ka nonghikai kala shah thombor ha ka kynhun ki khynnah skul hadien ba ka la pyntip sha ki kmie ki kpa jong ki halor ka jingbym lah ban lehbha ha ki jingpule ki jong ki.
Kane ka nonghikai la ong ba ka la shah kerkut ha kine ki khynnah skul baroh kiba dei ki shynrang hadien ba ka la ioh pat ia ka jingiada hadien ba katto katne ki khynnah kynthei napoh hostel kila pyntip mardor ia kane ka jingjia sha kiwei pat ki nonghikai. Hadien jong kane ka jingjia, na ka liang ki bor pyniaid skul kila pynpaw ba kane ka dei ka jingjia kaba sngew bynniaw bad sngew lehrain shibun, bad ong ruh ba na ka liang ki bor pyniaid skul kila shim ia ki sienjam jong ka jingpynshitom.
Na ka liang ka principal jong ka skul kala ong ba kala khot ia ki kmie ki kpa jong kine ki khynnah bad kyntu ba kin ialam noh ia ki sha la iing, hynrei na ka liang kiba haiing hasem kila kyntait ban shimti ia ki bad iehnoh ha khyrdop jong ka skul.
Katkum ki khubor la ong ba kila don haduh 22 ngut ki khynnah kiba ia don bynta ha kane ka kam pyntriem kiba la shah shim ia ki lynti jong ka jongpynshitom.
Hynrei, ha kawei ka liang na ka liang kine ki khynnah kila kyntait ia ka jingdonkti ka jong ki ha kaba iadei bad ka jingthombor.Watla katta ka jingtohkit halor kane ka jingjia ka dang iaid shakhmat.
