Guwahati, Nohprah 06: U Myntri Rangbah ka Jylla Assam, u Himanta Biswa Sarma hynne ka sngi u la kynthoh tyngeh ia u MP ka Congress, u Rakibul Hussain, da kaba kynnoh ba ula pyndonkam ia ki buit bapher bapher ban ioh nong haka sain hima tang ban jop ha ka ilekshon ha Samaguri constituency.
U Himanta u la kynnoh ba u Rakibul Hussain ba u la sam doh masi sha ki nongthep vote ha kine ki 25 snem ba la dep kum shi bynta jong ka buit ban jop haki ilekshon.
Kane ka jingkren jong u ka la pynmih biang ïa ki jingïakren halor ka “politik bam doh masi,” khamtam hadien ka rai jong ka Sorkar Assam ban khang ïa ki paidbah ban bam ïa ka doh masi, kynthup ha ki hotel bad ki jaka bam paidbah.
Haba kren ha ka jingialang paidbah, u Himanta Sarma u la ong “Kam long kaei kaei kaba thymmai ba ki briew na ka jondbynriew Muslim ki bam ia ka doh masi. Kaei kaba ngi ong ka long ba ym dei ban bam ha ki jaka paidbah kum ha ki hotel ne haki Restaurants. U Rakibul Hussain mynta u ong ba ha Samaguri, ki Muslim ki bam doh masi. Kumno ngan tip mano ba bam ne bym bam. Lada ki bam mynshuwa bad ki bam tang ha ka por ilekshon shiteng samoi, iakane hi tip tang u Rakibul”.
U Himanta u la kynnoh ba ka jingjop jong u Rakibul ha ka ilekshon ka dei na kane ka buit.
“Ha ki 25 snem ba la dep, u la jop, u kpa jong u ruh u la jop. Kata ka mut ba ki dang jop da kaba sam doh masi, bad mynta nga la khang noh ia kane” ong u Himanta.
