Guwahati, K’lyngkot 18 : Ka Iingmane bala 75 snem jong ka Balang Catholic, la kynnoh ba kala shah wiang ding ha ki riew runar ha ka miet 15 tarik Kyllalyngkot ha ka thain Ambagaon, kaba hap hapoh ka Udalguri District.
Kane ka jingjia kala jia ha ka por 10:30 baje mynmiet, kaba la pynmih ia ka jingiakynad hapdeng ki nongshongshnong jong ka thain.
Ki Pulit ka Udalguri kila pynlong ia ka jingtohkit kaba jur bha ban iohkem ia ki briew kiba donkti ha kane ka kam bymman.
“Ngi im ha ka Ri ba burom ia baroh ki niam bad kum kine ki kam thombor ki dei ki bym lah satia ban pdiang. Ki bor Sorkar ki dei ban pynthikna ia ka jingtohkit kaba bniah bad ban kem ia ki briew kiba donkti. Ngi pynrem jur ia kane ka kam bad kyntu ia ki bor District ban leh eiei pyrshah ia ki runar” ong ki nongshongshnong ka thain.
U Chief Executive Member (CEM) ka Bodoland Territorial Region (BTR) Pramod Boro, ula pynrem jur ia kane ka jingthom bor haba bthah ia ki bor District ba kin pynlong ia ka jingtohkit kaba bniah bad ban ai ka jingpynsajia kaba tyngeh ia kiba donkti.
Ki Dkhot ka BTR ba kynthup ia u Ranjit Basumatary bad Dhanjay Basumatary, kila leit jurip ia kane ka jingjia bad peitthuh ia ka jinglong jingman ha ka thain.
Kila kyntu ia ki nongshongshnong ka thain ba kin pynneh ia ka jingsuk bad ia ka jingiasuk iasain hapdeng jong ki.
