Imphal, K’Lyngkot 18: Wat hapdeng ka jingpyrshah kaba jur na ki sengbhalang Naga bad Kuki-Zo, ka Sorkar India ka la pyndep ia ka jingker khappud kaba 10 kilomitar ha shi lynter ka khappud Indo-Myanmar hapoh ka Jylla Manipur.
Hadien ba ioh jingtip bala pyniaid shaid shaid iaki kam kem sainar, ka kynhun na ki seng Naga, ba la ialam da u Ng Lorho, President ka United Naga Council (UBC) kila pynlong ia ka jingjurip ha khappud ia u Pillar 81.
Ha kane ka jingleit jurip la don lang ki nongmihkhmat na ka seng Naga Civil Political Organization (CNPO), All Naga Students’ Association Manipur (ANSAM), Naga Students’ Union Manipur (MSU), All Naga Council for Human Rights (ANCHR), Rengma Naga People’s Organization (RAMO), Naga Council of Churches (NCC) bad ki bor synshar shnong naka shnong Satang, Choktong, Lamlong Khunou, bad Waksu.
Ka UNC ka la pynpaw biang ba ki jaitbynriew Naga kim ju mynjur satia ïa ka jingïateh kular hapdeng ka India bad ka Myanmar ban buh ïa u pud u sam, da kaba kynnoh ba kane ka dei kaba la shna thok bad ba la shu mutdur hapoh ka jaka jong ki Naga.
Ka council ka la maham ba ka Sorkar India bad ka Sorkar Manipur kin shim ia ka jingkitkhlieh lada mih kino kino ki jingma na ka jingbteng ia ka jingtrei ban ker sainar.
Ka Jylla Manipur ka iasam khappud bad ka Ri Myanmar kaba jrong ym duna 398 km bad kane ka projek jingker sainar kaba mynta ka dei kaba la pynleit jingmut nyngkong eh hajan Moreh ha Tengnoupal district.
