Guwahati, Iaiong 13: U Nongialam ka seng Congress uba dei ruh u MP barim ka Rajya Sabha u Ripun Borah ula ther tyngeh ia ka sorkar Assam kaba la ialam da ka seng BJP, da kaba kynnoh ba kala sdang ia ka jingsynshar da ki kam pyntriem ban pynthohbria na ka bynta ka elekshon Panchayat kaban sa wan.
Haba iakren bad ki lad pathai khubor ha Rajiv Bhawan, u Borah ula kynnoh ba ka BJP namar ka jingsheptieng ia ka jingkiew jong ka jingioh jingkyrshan ka seng Congress ha ki shnong ki thaw, kumta kala sdang ia ki jingbyrngem byrsit, ki kam umsnam bad ka jingpyndonkam bakla ia ka bor synshar ban khanglad ia ki kyrtong jong ka liang pyrshah ban iashimbynta ha kane ka elekshon.
“Ka BJP kala kyiuh. Kila sngew skhem jingmut palat ba ka seng Congress kan ym lah ban pynieng kyrtong, hynrei ka jingkiew kynsan jong ka Congress kala pynkyiuh kylla ia ki” ong u Borah.
Ula ong ba ki nongshong shnong bad ki samla kila iaid ryngkat bad ka Congress, kumta kane kala pynlong ia ki seng kiba don ha ka liang synshar ban kyiuh bad sheptieng.
Ula kynnoh ruh ba ki nongialam ka BJP kila byrngem ban ym ai shuh ia ki jingai jingmyntoi (welfare benefit) kum ka Orunodoi Scheme lada ki briew ki jied ban iakhun na ka tiket jong ka seng Congress.
“Ki lah pyrkhat ba kin jop da 60% ia ka Zila Parishad khlem kano kano ka jingpyrshah. Hynrei ka lyer kala kylla kynsan bad mynta kila sdang ban leh da ki kam ban pyntieng koh tympan” ula ong.
Haba pynshai halor ka jingmih jong kiba bun ki jingjia, u Borah ula kam ba palat 1,000 ki nongtrei ka BJP ha Gohpur kila phet seng bad kila mad ia ka jingshah thombor. Ula pynkynmaw ia ka jingjia ha ka 11 tarik u Iaiong ha Samaguri, ha kaba u kyrtong ka Congress ula shah thombor ha ka por ba u leit thep kyrteng ban iakhun ia ka elekshon, hynrei ki pulit kila kyntait ban leh eiei. Ula pynpaw ruh kala don ka jingthombor bad la tar ia ki kot ki sla ban thep kyrteng kaba la jia ha Sonitpur District, ha kaba la kynnoh ba ki nongkyrshan ka BJP kila leit rung jubor ha ka ophis sorkar bad tar ia ki kot ki sla jong u kyrtong ka seng Congress.
Ha ka 12 tarik u Iaiong, u Borah ula ong ba u MLA ka BJP u Utpal Borah ula leit rung ha ka ophis kaba khmih bniah ia ki kot ki sla ha Pub Chaiduar bad la kynnoh ba ula pynbor ia ki ophisar ba kin pdiang ia ki kot ki sla kiba la dep ban kyntait kham hashwa bad ula ktah kti ruh ia u nongialam ka seng Congress. La ujor da ka ejahar halor kane, hynrei kam shym la don satia kano kano ka jingshah kem.
“Hato kadei ha kane ka rukom ba ka synshar paidbah ka long? La buh jingkylli u Borah. “U Myntri Rangbah uba dei ruh uba khmih ia ka tnad Kam Pohiing udei ban jubab balei ba ki pulit ki sngap jar watla kala don ka jingjia bad ki sakhi satar bad kala don ruh ka jingujor”.
Ula kynnoh ruh ba kane ka jingthombor ka BJP ka pyni shai kdar ia ka jingtieng ioh ka mad ia ka jingrem bad ula byrngem ia ka seng kaba don ha ka liang synshar ba ka jingpyndonkam ia ka bor met kan ym lah ban thombor pat ia ka mon jong u paidbah.
U Borah ula kyntu ia ki nongtrei ka seng Congress ban long kiba jai jai, ban iengskhem ha ka lynti kaban ym iaumsnam hynrei ban iakhun da ka jingthep vote.
“Ka BJP kala sdang sheptieng. Dei na kata ka daw ba kala pynkylla noh sha ka lynti jong ka jingiaumsnam. Hynrei ka histori ka pyni, ba phin ym lah ban thombor ia ka jingiakhih kaba shi rta jong u paidbah” ula ong.
U Borah ula ong ba ka Seng kan pynieng 95% ia ki kyrtong ha ka Gram Panchayat, ha kaba bun hi ki kyrtong kidei kiba dang hapoh 40 snem ka rta. Ula pynthikna ba ki nongialam kiba ha khlieh jong ka seng ki dang khmih bniah bad ia baroh ki jingjia kila dep ban pyntip sha ka State Election Commission (SEC).
U Borah ula pynrem jur ruh ia ka jingiai bteng ban kem ia u Ritam Singh, u Nongaiktien ka seng Congress bad ula ong ba kane kadei ka jingpyrshang ban pynrung ia ka jingtieng bad ban pynkhein ia ka jingkhlain jong ka seng.
“Kane kadei ka jingleh donbor” ong u Borah bad ka bynrap “Ngi lah long kiba lah pynkhreh. Ki paidbah ki don ryngkat bad ngi. Ngin sa pynphai kylla ia ki lyngba ka jingthep vote ym da u kuli”.
Ha kane ka jingiakynduh ia ki nong pathai khubor la iadonlang ruh ki Nongialam ka Congress kiba kynthup ia u Nripen Thakuria bad u Rhituporna Konwar.
