Nongpoh, Iaiong 13 : Kawei ka Longkmie kala khlad hashen bad uwei ula mynsaw jur haba ka scooty ba ki iashong, kala shah rat ha kawei ka trok ha ka surok Shillong By-pass ha ka thain Umroi marjan ka Tyndai Resort.
Kane ka jingjia kala jia hynne ka janmiet sngi U Blei ha ka por 4 baje janmiet.
Ka khubor ka iathuh ba kane ka longkmie ba khlad ka dei kaba la tip kyrteng ka kong Sidora Langstieh (29) kaba shong ba sah ha Nongsder, Block-B bad uba mynsaw pat u dei uba la tip kyrteng u Rai Singh Laloo (30) uba na Umroi Nongrah.
La iathuh ba kane ka trok ka bym lah ban tip nombor, kala tynrah ia kane ka scooty ML05-AA-9898 katba kine ki arngut ki dang hiar na Umroi Umdohbyrthi sha Umroi Nongrah.
Ki Pulit ka Khapmara PIC kila poi mar mar sha katei ka jingjia ban pynlong ia ka jingtohkit. Ia une u ba mynsaw la pynkit noh sha Bhoirymbong CHC ban ioh ia ka jingsumar.
