Doomdooma, Jymmang 22: Haduh 11 ngut ki briew kila iap na ka jinglynshop ka jingpang prie bad pynhiar tang hapoh ka shitaiew, hapoh ka thain Doomdooma Revenue Circle jong ka Tinsukia District, Assam.
Kane ka jingjia kala jia hapoh ka Tongonagaon Tea Estate kaba hap hapoh ka Doodooma Revenue Circle. Kane ka jingjia kala pynsyier ia ki paidbah halor ka jinglong jingman hapoh kane ka jaka rep slasha.
Kane ka jingpang kala sar kum ka khlam khamtam ha ka thain Kulibill jong kane ka kper rep slasha ha kaba bun ki briew kila iap ha kane ka jaka.
Kat kum ka khubor, kiba bun ki briew kila don mynta hapdeng ka jingsumar ha ka hospital ba don ha kane ka kper slasha hynrei namar ka jingbym biang ka rukom ai jingtip, kiba bun kiba iabit ia ka jingpang kila shong beit ha iingkhlem da leit shim dawai satia.
Ka Assam Tea Tribe Students’ Association (ATTSA), Tinsukia district committee, kala phah ia ka dorkhas sha u District Commission ba dawa ban leh eiei mardor ha kaban lei tai jingsumar ia ki nongpang kiba thiah pang hala iing lane ha ki hospital.
Kala dawa ruh ban ai jingiarap song pisa sha ki longiing jong ki briew kiba iap na kane ka jingpaang nalor ban pynlong ia ka medical camp ha baroh ki kper slasha jong ka District.
