Dibrugrah, Jymmang 06 : Ki Pulit ka Tinsukia ha ka sngi thohdieng, kila ong ba ka khynnah 12 snem, ia kaba ka met la lap na septic tank ha sor Margherita, ka lah ban shah leh beijot ha ki katto katne ngut ki briew shuwa ban shah pyniap.
U Briew ba hakhmat eh ba donkti u Anan Tanti ula shah kem ha ki Pulit na Namsang Tea Estate ha ka thain Joypur jong ka Dibrugarh District kaba don ha khappud bad ka Arunachal Pradesh.
U Tanti ula mynsaw na ka jingshah siat ha ki Pulit katba u dang pyrshang ban phet. Ia une ubriew la ialam noh sha Margherita Police Station ha Tinsukia District bad la pynkit ia I sha Assam Medical College and Hospital ban ai jingsumar ia baroh artylli ki kjat ba shah siat ha ki Pulit.
U Sub Divisional Police Officer (SDPO) ka Margherita Hemanta Kumar Boro haba iakren bad ki lad pathai khubor ula ong ba ha ka jingtohkit ba dang leh malu mala, la suba jur ba kane ka khynnah ka lah ban dei ka lanot jong ka kam lehbeijot ha ki katto katne ngut ki briew shuwa ba kan shah pyniap.
U pyntip ba ki Pulit kila pynlong ia ka jingthwet kaba jur ban iohkem ia u Khun Rangbah jong u Anan Tanti, uba la phet krad naduh ka sngi ba jia kane ka jingjia. La suba jur ba u Anan bad u Khun kila leh beijot bad pyniap ia kane ka khynnah.
Uwei pat u Khun, uba dang khynnah, ruh ula jah rngai nala ka jong ka Iing naduh kane ka sngi ba jia. Ki Pulit ki la ong ba lada shem ba une u khynnah ruh u donkti lang ha kane ka kam bymman, ia u ruh ynsa kem bad sa tian bishar kat kum ka Juvenile Justice Law.
“Ka jingbishar ia kane ka kam bymman ynsa leh ha ka fast track court. Ngin sa aiti ia ka chargesheet hapoh ka shibnai. Ia kine ki nongleh bymma la pyngat ha ka kyndon 302 (pyniap), 376 (lehbeijot), 376 DA ( leh beijot kynhun ia ka Khynnah ba hapoh 16 snem) bad ka kyndon 6 jong ka POCSO Act. Ngin pynthikna ba kane ka khynnah kan ioh ia ka jingbishar kaba hok” ong u SDPO.
Ula pyntip ruh ba ka Ganga Rani Tanti, ka kurim u Anan Tani, kala shah kem bad la buh ia ka hapoh ka Police Custody kat kum ka jingaibor ka IIngkashari na ka bynta ban tohkit kham bniah ia kane ka jingjia.
