Guwahati, Lber 10 : Ka All Assam Students Union (AASU) bad 30 tylli ki jaidbynriew ritpaid kila pynlong ia ka jingiashong shah jingit ba 12 kynta ha kylleng ki jaka ka Assam ban pyrshah ia ka Citizenship Amendment Act (CAA).
Kane ka jingiashong shah jingit kala sdang hynne ka step por 6 baje bad kan kut haduh ka por 6 baje janmiet harud ka Dighali Pokhuri, Guwahati lem bad ha kiwei kiwei ki jaka jong ka Assam.
Ka AASU kala dawa ban pynduh pyndam noh ia ka Citizenship Amendment Act (CAA) 2019 bad pynrem jur ia ka Sorkar BJP.
Haba iakren bad ki lad pathai khubor, u President ka AASU Utpal Sarma ula ong “Ka Sorkar kala pyrshang ban tyngrong ia ka jingeh jong ki poiwir shiliang duriaw da kaba pyntreikam ia ki katto katne ki rule. Kumjuh ruh, la maham ia ka Sorkar ba ki paidbah jong ka thain Shatei Lam Mihngi kin ym pdiang ia kaei kaba kim pdiang”.
Ha ka sngi ba u Myntri Rangbah Duh ka Ri Narendra Modi ula wan poi ha Assam kata ha ka 8 tarik Lber, la pynmeh dongmusa ha ki dur jong ki san ngut ki briew ba iap ha ka jingiakhih pyrshah ia ka CAA bad la pynlong ruh ia ka jingialang kynmaw burom ia kine kiba iap.
La pyntip ba ia ka copy jong ka CAA yn sat hang ha kylleng ki jaka jong ka Jylla ha ka sngi ba pyntreikam ia ka.
Kan sa don ruh ki rally ha man ki district headquarter shisngi hadien ba pyntreikam ia ka CAA rules. Kine kin dei ki prokram jingiakhih.
“Ngi la kut jingmut ban pynbteng ia ka jingiakhih ha surok bad ruh ka jingiakhun mukotduma pyrshah ia ka CAA ka ban iaid lang ryngkat ryngkat” ula ong.
