Dibrugarh, Lber 20: Ki Pulit ka Punjab kila pynkit noh ia hynniew ngut ki nongiarap u Nongialam ka kynhun Khalistan Amritpal Singh, sha Punjab na ka kad liengsuin Dibrugarh hadien ba la aiti da ki Pulit Assam.
Ha ka sngi Palei, hadien ba la dep ban leh ia ki jingdonkam baroh ha kaba iadei ban pynkynriah ia ka jingshah set patok ia ki hynniew ngut ki nongiarap u Amritpal Singh, la pyllait na phatok pdeng Dibrugarh bad la aiti noh sha ka kynhun pulit jong ki Punjab kaba don 25 ngut ki dkhot ba la ïalam da u Superintendent of Police (SP) u Harinder Singh Gill.
Ki hynniew ngut ki kynthup ïa u Daljit Singh Kalsi, u Kulwant Singh Dhaliwal, u Gurmeet Singh Bukkanwala, u Harjit Singh, u Bhagwant Singh ba la ju sin kum u Pradhan Mantri Bajeke), u Basant Singh, bad u Gurinderpal Singh.
Ia kine ki hynniew ngut la pynkit ia ki ha ki ar tylli ki liengsuin ba kyrpang na ka kad liengsuin Dibrugarh.
Katba u Amritpal Singh, ha ryngkat u Papalpreet Singh bad u Varinder Singh Johal, kin dang bteng ban shah set hapoh ka NSA, ha kaba ka jingshah set phatok, kan kut noh ha u bnai Jylliew 2025.
Kane ka sienjam kala wan ha ka por ba ka sorkar Punjab ba lam khmat da ka Aam Aadmi Party (AAP) bad kaba kham pawnam ka long ba u Amritpal Singh u la jop ïa ka election lok sabha na Khadoor Sahib ha u snem 2024 na phatok Dibrugarh.
