Nongpoh, Lber 20 : Ka seng Hynniewtrep Youth Council-Raid Thadrang Circle, ha ka step sngi Palei, kala hiar ban khlong ia ka rong ha kiba bun ki bynta jong ka surok Khyndewso-Kyrdem-kaba dang shu pyntrei thymmai, ban pynshisha ia ka jingkynnoh trei torti u contractor ia ka kam.
Ka HYC-Rad Thadrang ka ring ia ka dur khih (video) ba pyni shai ba ka jingsiang rong ia kane ka surok la shu siang kum ba tap carpet ha iing ban shu pynitynnad ne pynithymmai – kaba lah pat ban khlong bad khyllie da ki shympriah kti khlem da pyndonkam tiar.
Ka jingsiang rong thymmai ia kane ka surok ka dei kaba dang shu dep pyntrei dang shen. Kane ka surok ka dei kaba iaid lyngba na Khyndewso sha Kyrdem bad iaid ter ter sha Bhoirymbong.
Ka HYC-Raid Thadrang Circle bala ialam da u General Secretary samla Pyndap Marsharing ha ka jingiadon lang u Secretary ka HYC Ri-Bhoi samla Shemphang Marsharing, kila hiar jurip ia baroh shi lynter jong kane ka surok hynne ka sngi ban pynshisha dalade ia ka jingud jingnam ki paidbah ka thain halor ka rukom wan siang rong thymmai ia ka surok.
Haba kren sha ki lad pathai khubor, kine ki nongialam ka HYC kila pynpaw ia ka jingsngewkhia ia ka rukom siang rong ia ka surok bad kynnoh ba kane baroh ka dei ka jingtrei torti jong u contractor bad ka jingkhein sting jong ki Engineer ka tnad PWD (Roads).
“Ka jingwan ka surok ba bha ha ka thain ka dei shisha ka jingmyntoi kaba khraw ia ki paidbah hynrei ka jingtrei torti kumba paw ha kane ka surok, kan wanrah pynban ia ka jingduhnong ym tang ia ka thain ka ban ap tang ia ka jingjot biang ka surok tang khyndiat por hynrei wat ia ka pla tyngka jong ka Sorkar” kila ong.
Kine ki nongialam ka HYC kila kyntu jur ia ka Tnad PWD ba ka dei ban shimkhia mardor ia kane ka kam bad ba kan leh eiei pyrshah ia u contractor ba un wan shna janai noh ia ka surok kat kum bala pynmang pisa da ka Sorkar.
