Guwahati, Jylliew 01: Haduh 8 ngut ki briew kila iap bad palat 3.4 lak ngut kila shah ktah bad hap phet shnong ha ki 11 tylli ki District ka Jylla Assam namar ka jingshlei um kaba shyrkhei.
Ka Assam State Disaster Management Authority (ASDMA) kala pynthikna ia ka jingiap ki 6 ngut hynnin ka sngi Thohdieng, kala pynkhuslai jur katba ka Jylla ka dang pynkhreh ia ka jingwan ka lyiur bad ka jingshlei um kaba jur.
Ban pynduna ia ki jingktah, ka Sorkar kala wanrah ia kiba bun ki sienjam. Kala buh haduh 148 tylli ki jaka iarap ba shipor bad 39 tylli ki jaka sam marbam sha ki briew kiba hap phet na ki iing ki sem.
Ka Cachar District ka dei kaba shah ktah jur eh bad kumba 1.2 lak ngut ki briew kila hap ban phet shnong namar ka jingshlei um. Kiwei pat ki jaka kiba shah ktah jur ki dei ka Nagaon bad Hojai, ha kaba da ki hajar ngut kila hap mih nala ki jongki jaka ban leit sha ki jaka ba shngain.
Kumba 28000 ngut ki briew kynthup ki kynthei ba armet bad ki khynnah khunlung, kila don mynta ha ki ktem ai jingiarap.
Palat 10 lak tylli ki jingri kila shah ktah bad da ki spah tylli ki iing kila shah pynjulor bad shah rong noh ha ka umsaw.
Ki lah pyniasoh ne surok ha ki 7 District kila shah pynjulor klai bha namar ka jingtap ka um ia ka surok Highway bad ki shnong shnong, kaba la ktah ia ka leit ka wan jong ki kali kit mar bam bad kiwei kiwei.
U Myntri Rangbah Duh ka Ri ula kular ia ka Jylla ban ai ka jingiarap na ka Sorkar Pdeng ha kaban lah leh eiei halor kane ka jingshlei um. U Myntri kam Pohiing Amit Shah ruh ula phone ia u Myntri Rangbah ka Assam Himanta Biswa Sarma ban iakren ia kane ka kam.
