Guwahati, Naiwieng 08 : Ka tnat Criminal Investigation Department (CID) ki pulit ka Assam kala kem noh ia u heh pulit ba la shah sospon na ka kam lem bad ia laingut ki doktor ka hospital sorkar ha Darrang district ha kaba iadei bad ka jingiap jong kawei ka khynnah 13 snem rta hapoh Dhekiajuli.
U Rupam Phukan uba dei u Additional Superintendent of Police (ASP) ka Darrang district uba la shah sospon ula shah kem noh hynnin ka sngi ba Ar halor ka jingshim sting ha kaba iadei bad ka jingshimti ia ka case kaba iadei bad ka jingiap kaba kham pher jong katei ka khynnah.
Ka tnat CID ha ka sngi Nyngkong ba la lah kala kem noh ia laingut ki sorkar ka hospital sorkar halor ka jingkynnoh aiti d ka report post mortem kaba la shu shna thok ha kaba iadei bad ka jingiap jong katei ka khynnah.Kine ki laingut ki doktor kiba la shah kem noh ki dei kiba la tip kyrteng kum u Anupam Sarma, ka Ajanta Bordoloi bad u Arun Das.
Kham hashwa ka tnat CID kala kem noh ia uwei u Sub-Inspector uba la tip kyrteng kum u Utpal Bora, uba dei u Officer-in-Charge jong ka Dhula police station ha katei ka por hadien ba la lap ia ki sakhi satar ba ula shim ia ka pisa bam sap kaba T.5 lak na kiba haiing hasem jong uba shah kynnoh donkti halor ka jingiap jong kane ka khynnah u Krishna Kamal Baruah, kata da kaba iarap beain sha ka liang ka jong u.
U heh pulit ka Assam u Rajib Saikia ula ong ba ia kine ki laingut ki doktor la wallam hakhmat ka kashari, kaba la aiti arsngi sha ki bor pulit na ka bynta ban pynlong ia ka jingtohkit.Ia utei u heh pulit u Rupam Phukan yn wallam mynta ka sngi hapoh ka kashari.
Namar ki katto katne ki jingpulie ha kaba iadei bad ka jingtohkit da ki bor pulit ka Dhula PS, na ka liang u Myntri Rangbah (CM) ka Assam u Himanta Biswa Sarma hadien ka jingleit jurip ia ka iingsah jong katei ka lanot ula hukum ban aiti ia kane ka case sha ka tnat CID na ka bynta ka jingtohkit kaba bniah.
Kumta ruh ia kane ka case la aiti noh sha ka tnat CID ha ka 12 tarik u Nailar ba la dep, bad ha kane ka jingtohkit ba la lamkhmat da ki heh pulit la lap ruh ia ki sakhi satar halor ka kam lehbor, kam pyniap, ka jingthmu ban pynjah ia ki sakhi satar, ka jingpyrshang leh beijot kiba long hapoh ki kyndon jong ka PIC bad ka kam lehbor ia ka khynnah kaba dang hapoh ka rta hapoh ki kyndon jong ka POCSO Act, ong u CPRO u Saikia lyngba ka lad pathai khubor.
Nalor kata ula ong ruh ba ha ka jingtohkit, ka tnat CID kala leit sei biang ia ka metiap na ka bynta ban leh ia ka post mortem kaba ar da ka jingiatreilang ki riew shemphang na ka tnat forensix nalor ka jingleh ia ka DNA ha kaba la shem ba ka jingkhah kaba bit ha ki jain jong kane ka lanot ka iadei bad kaba mih na utei uba la shah kynnoh donkti.
Kumta ruh hadien kane la ujor pyrshah ia une u briew uba la shah kynnoh donkti u Krishna Kamal Baruah ha ka 25 tarik u Nailur ba la dep, bad mynta u dang don hapoh ka jingtohkit jong ki bor pulit, ong shuh shuh u Saikia.
