Guwahati, Jymmang 31: Ka Chief Minister’s Vigilance Cell ha ka sngi Ba-ar, kala kem sa 4 ngut ki briew kynthup ia 2 ngut ki Nongthoh khubor na Guwahati, kiba donkti ha ka jyrsieh SCERT.
Kine ki arngut ki Nongthoh khubor ki dei kiba la tip kyrteng kum ka Pujamoni Das bad u Bhaskar Jyoti Hazarika. Kiwei pat ki dei u Nongpan RTI Arup Saikai bad u Rabijit Gagoi.
Kat kum ka jingong ki Pulit, kine kila donkti ha kaba blackmail ne dawa pisa ia ka Ophisar IAS ba shah sospon ka Sewali Devi Sharma, kaba donkti hakhmat eh ha kane ka jyrsieh.
Kane ka jyrsieh kala jia ha ka por ba ka Sewali ka dang dei ka Executive Chairman bad Director ka State Council of Educational Research bad Training (SCERT), Assam hapdeng u snem 2017 haduh 2020.
Kane ka Ophisar IAS kala shah kem dang shen halor ka jingdonkti ha kane ka jyrsieh. Kat kum ka khubor, kine kila shim pisa kaba long beit beit da ka pisa bad ka jingphah thep lyngba ki bank.
Kane ka Ophisar IAS ha ryngkat u Pyrsa kurim jong ka, kila bam klop haduh 105 klur khlem da pyni ia kano kano ka work order.
Kat kum ka khubor, ia kane ka Ophisar IAS bad ia u Pyrsa Kurim u Ajit Pal Singh, la ioh ban kem na kawei ka Iing ba ki rieh tngen kaba don ha Rajasthan.
Kine ki 4 ngut ki briew ba shah kem kila dawa pisa na ka Sewali bad kila ioh kamai da ki lak tyngka ba kin sngap jar halor kane ka kam jyrsieh jong ki.
