Guwahati, K’Lyngkot 03: Ki Pulit kila kem ia 18 ngut ki briew ba kynthup ia saw ngut ki kynthei, ha kaba iadei bad ka jingshah pyniap ba shyrkhei jong ki shijur halor ka jingkynnoh menai ksuid ha Karbi Anglong district, Assam.
Kane ka jingjia, ka la jia ha ka 30 tarik Nohprah, 2025, ha ka shnong Beloguri Munda, kaba don ha ka thain Howraghat, ha kaba la kynnoh ba kitei ki arngut, ki la shah thombor ha ka kynhun jong ki nongshong shnong, kiba la shah pynngop ha ka jingngeit biej.Ki pulit ki la iathuh ba kitei ki lanot kiba la shah shoh bad hadien la thang ia ki, kaba la pynlong ia ki ban iap.
“Ngi la ithuh ia ki nongshah kynnoh bad ngi la ioh ban kem haduh 18 ngut ki briew haduh mynta.Ka dang lah ban don ka jingkem shuh shuh katba nang iaid ka jingtohkit”, la ong u Superintendent of Police ka Karbi Anglong u Pushpraj Singh.
Ki pulit ki la pyndonkam ia ki kyndon ba iadei jong ka Bharatiya Nyaya Sanhita, kynthup ia ka kyndon 103 (ka jingpyniap briew).La register ruh ia ka suo motu case hapoh ka ain Assam Witch Hunting (Prohibition, Prevention and Protection) Act, kaba khein ia ka Witch Hunting kum ka kam runar kaba lah ban tip bad kaba ym lah ban ioh jamin.
Katkum ki nongtohkit, la ong ba kitei ki shijur ki la shah kynnoh ha ki nongshong shnong ba ki dei kiba ai ksuid bad ki dei kiba donkti ha kaba iadei bad ki jingpang bad ki jingsniew ha katei ka thain.La kynnoh ba kitei ki shijur ki la shah thombor hapoh iing jong ki shwa ba kin shah thang ia ki.
Ki pulit ki la iathuh ba ka jingtohkit ka dang iaid shakhmat ban lap ia baroh kiba donkti bad ban lap ia ki briew shimet kiba don bynta ha katei ka kam runar.
