Shillong, K’lyngkot 03 : Ka Meghalaya Residents Safety and Security (Amendment) Bill, 2020 (MRSSAB) kan dei ka Bill ka ban sa shu iap hi hadien ba ka Ministry of Home Affairs (MHA) kala ai jingmut ia ka Sorkar Jylla ban wad da kiwei pat ki sienjam, haba pynpaw ba kane ka Bill ka iatakhuh bad ki ain ka Sorkar Pdeng ba treikam ha baroh ki Jylla.
Kane ka Amendment Bill ka dei kaba la tyrwa ban wanrah ia ki Facilitation Centre (Entry-Exit Point) hapoh ka Residents Safety and Security Act, 2016 (MRSSA) ban tehlakam ia ka jingrung kyrthep ki briew ba namar sha ka Jylla.
Kat kum ka jingong u Symbud Myntri Rangbah ba khmih ia ka kam Pohiing (Police) Bah Prestone Tynsong, ka Sorkar Jylla kala tyrwa ia ka Amendment jong ka MRSSA, 2016 namar ba kam don satia ia ka kyndon ban pynieng ia ki Entry-Exit Point.
“Haba ia ka rai jong ka Sorkar la tynjuh pyrshah ha Iingkashari, ka Iingkashari kala khein iap ia ka, kaba la pynbor ia ngi ban shna ia ka Meghalaya Residents Safety and Security (Amendment) Bill, 2020,” ula ong haba bynrap “U Lat barim Tathagata Roy ula phah ia ka Bill sha ka Ministry of Home Affairs ban bishar. Ka MHA kala pynphai ia ka, haba ai jingmut ia ngi ban wad da kiwei pat ki sienjam namar ka Amendment ka iatakhuh bad ki ain ka Sorkar Pdeng”.
“Jin lada ngi dei ka Jylla kum ka Manipur, kaba ym donkam ban mih ne iaid sha ka Assam, Barak Valley, Tripura lane Mizoram, ka Bill lehse ka lah ban ioh ia ka jingmynjur. Namar ka Amendment ka iatakhuh bad ki ain ka Sorkar Pdeng, ym shym la lah satia ban pyntreikam hangne” ula pynshai.
“Shisien ba ka bill kam ioh ia ka jingmynjur u Lat, ka shu iap hi noh kumto” ong u Bah Prestone.
U pyntip “Ia mynta, ngi pyntreikam ia ka MRSSA, 2016, kaba pynleit jingmut thik tang ia ki nongshong wai bad kam don satia ia ki kyndon ban buh ia ki entry-exit point”.
Nalor kane, u Symbud Myntri Rangbah ula kdew ba ka Sorkar barim u Dr Mukul Sangma kala leh ia ka jingbakla da kaba pynrung ia ka kyndon entry-exit point tang hapoh ka rule ym ha ka principal act. Kane ka jingleh bakla kala pynlong ia ka MRSSA kaba khlem pura bad kaba lah ban shah tynjuh ha ka Iingkashari.
“Ka MRSSA 2016 ba mynta, ka dei ka bym pat dep pura, kan bhah shibun lada ai kyrteng noh ia ka da ka ‘Tenants Bill’ namar ka kren beit thik tang ia ki kam ki nongshongwai. Ki bor synshar barim kila pyrshang ban ialam bakla ia u paidbah da kaba pynrung ia ka kyndon entry-exit point tang ha ka rules watla ka Act ka long jar jar ia kane ka bynta” ula ong.
 Bill, 2020 (MRSSAB) kan dei ka Bill ka ban sa shu iap hi hadien ba ka Ministry of Home Affairs (MHA) kala ai jingmut ia ka Sorkar Jylla ban wad da kiwei pat ki sienjam, haba pynpaw ba kane ka Bill ka iatakhuh bad ki ain ka Sorkar Pdeng ba treikam ha baroh ki Jylla.){kind=link}