Guwahati, Jylliew 30: Ka jingkyndang ban pynkynriah briew kaba heh bha kala sdang mynta ka sngi Nyngkong ha ka shnong Bakrikuchi kaba hap hapoh Barkhetri, Assam jong ka Nalbari district, ha kaba ki bor pyniaid district kila pynkhuid phar ia kiba kynnoh wan kyntur pud na ki palat 450 bighas ki jaka sorkar.
Kum shi bynta jong ka operation, palat 100 tylli ki iing briew kila shah pynpra da kaba pyndonkam da ki puh shilum, Ki heh ophisar kila kam ba kitei ki jingtei kidei kiba beain bad ka long kaba donkam ban kyndang ia ki khnang ban ioh biang ia ki jaka jong ka sorkar.
Ka jinglong jingman ha katei ka thain kala kylla long ka jingjia ba sngewsih bad ba sngew myllung ha kaba la sakhi ia ka jingiam briew jong kiba bun ki long iing bad kamtam eh ia ki kynthei bad ki khyllung khynnah kiba iam bad kyrpad katba ki dang peit ia ki iing jong ki ba la pynpra. La don ki nongshong shnong kiba la pynpaw ia ka jingsngewsih, da kaba ong ba ki la shah iehnoh kynsan khlem iing khlem jaka ban leit.
Na ka liang ki bor pyniaid District kila pynpaw ba kane ka jingpynkynriah kala iaid beit iaid ryntih khlem da don ka jingialeh pyrshah na ki nong shong shnong. U wei u heh pulit na Nalbari u la iathuh ba kine ki briew ba shong basah kila ioh jingtip lypa shwa ka por bad kiba bun ki kyrshan ia kane ka kam.
Hynrei, ki long iing kiba shah ktah na kane ka jingshah kyndang kila pynpaw ia ka jingpyrshah ba jur bha bad ki bor pyniaid district bad don ruh ki nong shong shnong kiba la kam ba kine ki briew kila sah ha kane ka jaka la kumba 30 – 40 snem bad kila buh ruh ka jingkylli, shaei kine kiba duk kin leit lada man la ka bynta jong ka jaka la kam ba kadei jong ka sorkar bad kiba bun kila kyrpad iaka sorkar ba kin pynbiang ia ki da kiwei pat ki jaka rieh ba shipor
Kane ka jingkyndang ka long kum shi bynta ban pyniar ia kum kane hi kajuh ka jingleh ha Assam da ka jingthmu ban weng lut ia baroh kiba shu wan kam trai jubor ia ki jaka jong ka sorkar, hynrei kum kane ka jingleh ka wanrah ia ka jingsngewkhia ha kaba iadei bad kane ka jingshah pynkynriah.
