Assam | Sar ka NDA ia ka eleshon siteng samoi ha Assam | Jem khnap ka Congress

Guwahati, Naiwieng 23: Ka National Democratic Alliance (NDA) kaba la ialam da ka seng BJP kala pynrem kput ia ki Liang pyrshah haka jylla Assam da kaba khur ia ka jingjop ha baroh 5 tylli ki Assembly Constituency haka elekshon shiteng samoi.

Ka seng Congress bad ki kynhun kiba iatreilang kila sah thylli khlem kano kano ka jingjop kaba pyni ba kala don ka jingkylla kaba khraw ha ka kam saiñ pyrthei.

Ka Bharatiya Janata Party (BJP) kala jop 3 tylli ki seat, katba ka Asom Gana Parishad (AGP) bad ka United People’s Party Liberal (UPPL) kila ioh mar 1 ka seat.

Ka jingjop kaban sahnam kadei ha Samaguri, kaba dei ka kten jongka Congress naduh u snem 2001, ha kaba u kyrtong ka BJP u Diplu Ranjan Sarma ula pynrem ia u kyrtong ka Congress u Tanzil Hussain da 24,423 vote, ha kaba ula ioh 81,160 votes katba u Hussain ula ioh 56,737 vote.

Ha Behali, u kyrtong ka BJP u Diganta Ghatowar ula pynrem ia u kyrtong ka Congress u Jayanta Borah da 9,051 vote, katba ha Dholai, u kyrtong ka BJP u Nihar Ranjan Das ula pynrem da 9,098 vote ia u kyrtong ka Congress u Dhrubajyoti Purakayastha.

Ha Bongaigaon, u kyrtong ka AGP u Diptimayee Choudhury ula jop da 35,164 vote pyrshah ia u kyrtong ka Congress u Brajenjit Singha, katba ha Sidli, u kyrtong ka UPPL u Nirmal Kumar Brahma ula jop da 37,016 vote pyrshah ia u kyrtong ka BPF u Sudha Kumar Basumatary.

Haba pynpaw ha ka rynsan X, u Myntri Rangbah ka Assam u Himanta Biswa Sarma ula ong ba ka NDA kala jop da 5/5 ha ka elekshon shiteng samoi ka pyni baka Assam ka ai ka jingkyrshan kaba radbah ia ka Adarniya @narendramodi Ji’s ka jingiohi jngai naka bynta ka jingsynshar kaba bha bad ka roi ka par.

“Ka jingkdew kyrpang ia ka Samaguri, ka constituency kaba don 65% da ki ritpaid kaba la bat da ka Congress la 25 snem, mynta la jop da ka BJP. Kane ka histori jong ka jingjop ka pynskhem ia ka jingshaniah ki paidbah halor ki mat jong ka bha ka miat bad ka jingkyntait war ia ka liang pyrshah kaba iaid da ka buit jong ka jingiapait iapra” ula ong.

U Myntri ka tnad Ports, Shipping & Waterways, u Sarbananda Sonowal ula ai khublei ia ka jingjop don burom ka BJP kaba ialam ia ka NDA ha Maharashtra bad Assam kaba dei k aresol jongka jingsai jingsynshar kaba bha jong u Myntri Rangbah duh ka ri u Narendra Modi.

U Sarbananda Sonowal ula ong, “Hapoh ka jingialam u nongialam ba tbit u Myntri Rangbah duh ka ri u Narendra Modi, ki polisi kiba la wanrah ia ki jingkylla, kila jop ia ka dohnud jong ki paidbah ha kylleng jong ka ri. Ka resol mynta ka sngi, ha ka elekshon ha Maharashtra bad ka elekshon shiteng samoi ha Assam ka pyni shai kdar ia ka jingshaniah u paidbah ia ka jingialam u Modi bad ka sorkar NDA. Ki polisi treikam ki jongu kiba iadei bad u paidbah kala wanrah ia ka jingkylla ha ka jingim jong ki nongshong shnong ka ri India.”

U Sonowal ula pynpaw ruh ia ka jingsngewnguh ia ki paidbah kiba laai ka jingkyrshan kaba radbah ha ki constituency kiba kynthup ia ka Bihali, Chamguri, Dholai, Bongaigaon bad Sidli, ha kaba ki kyrtong ka NDA kiba kynthup ia u Diganta Ghatowal, Diplu Ranjan Sharma, Nihar Ranjan Das, Deeptimoyee Chowdhury bad Nirmal Kumar Brahma kila khur ia ka jingjop.

U nongialam ba rangbah ka BJP ula ai khublei ia kine ki kyrtong kiba la jop ia ka elekshon bad ula ai khublei ruh ia ki paid nongthep vote kiba la ai ka jingshaniah ia ka BJP.

U Sonowal ula banjur ba kine ki kyrtong kiba dang shu shah jied kin iai bteng ban treikam na ka bynta ban kyntiew ia ka roi ka par ha ki constituency ki jongki bad kin trei na ka bynta ban jop ia ka dohnud jong ki paidbah.

Ha kawei pat ka liang, u Gaurav Gogoi uba la long MP 3 sien bad u Deputy Leader ka Congress ha Lok Sabha ula shim ia ka jingkitkhlieh kaba pura halor ka jingshah rem ka Congress ha Behali.

“Watla ngim don MLA ne ki nongtreikam ha ka thain, ngi la lah ban kiew bha ha ka jingioh vote ka seng Congress ha ka jaka jong ka BJP. Ngi la pynduna ia ka jingiapher hapdeng ka BJP bad ka Congress da palat shiteng. Wat hapdeng ka kynhun myntri baroh kawei jongka BJP, ki MLA bad ki heh jong ki Autonomous Council kiba la ialap elekshon haduh 3 taiew” la ong u Gogoi ha ka rynsan X.

“Ka don ka jingkhih ia ka seng ban kiew shuh shuh ha North Assam bad katei kan dei kaba nga ngan pynleit jingmut bha. Nga pynpaw ia ka jingsngewnguh ia baroh ki nongtrei bad ki nongkyrshan kiba la ieng ryngkat bad ngi. Nga sngewnguh ia ki paidbah ka Behali halor ka jingieid bad ka jingkyrshan jong ki” la bynrap u Gogoi.