Boko, Jylliew 9: Ka jingtwa khyndew kaba jur ha shilynter ka wah Brahmaputra ka la bam duh ïa ki bynta kiba heh jong ka skhim ïada wah kaba la kot da ki klur tyngka wat hashwa ban pyndep ïa ka, kaba la pynmih ïa ka jingtieng bad jingbitar hapdeng ki nongshong shnong kiba sah harud jong ka wah.
Ha ka jingjia kaba pynkyndit kaba la ioh ring ha ka video, ka jingkhlain jong ka wah Brahmaputra ka la rong noh ïa ki kynroh geo-bag ba la shna hapoh ka projek ban ïada ïa ka jingtwa khyndew kaba la kot sha ka 300 klur tyngka. Kane ka skhim kaba la shna ban iada ia ki bynta ba donkam jong ka wah, mynta ka la jan shah bam duh ha ka um.
Kane ka jingjia ka la jia ha ki thain Barakhat bad Khalihamari ha Chamaria LAC kaba hap hapoh ka Guwahati division jong ka tnad Water Resources.Ki nongshong shnong, ki kynnoh ba ïa kane ka projek, ba la aiti sha ka Brahmaputra Infrastructure Limited, la pyntreikam da ki tiar ki bym biang bad ki jingpynkheiñ ba paw pyrthei ïa ki kyndon. Ki kam ba ki engineer bad ki sub contractor ki bym don jingtbit ki la kitkhlieh ia katei ka kam, kaba la pynlong ia ka jingtei kaba sniew kaba ym lah ban shan wat ia ki jingshlei um kiba rit.
Tang kumba lai bnai hadien ba la dep, ka jingker um ka la twa, kaba la pynpaw pyrthei ïa kaei kaba ki nongshong shnong ki batai kum “ki jingtrei bymhok kaba shyrkhei, ka jingbym biang ka jingtrei, bad ka jingbamsap kaba heh.” Ha ka jaka ban ai jingshngain, kane ka projek mynta ka la kylla long ka jingma kaba lah ban pyniap ia ki longiing kiba don harud wah.
Ki nongshong shnong ki tieng ba lada ka jingtwa khyndew ka nang jur, ki iing ki sem, ki jaka rep bad ki jaka shong jaka sah baroh kawei ki lah ban ngam ei sha wah tang hapoh khyndiat por. Ka imlang sahlang ka im ha ka jingkhuslai kaba man ka por, ka jingkylli mano ban shim ia ka jingkitkhlieh na ka bynta kane ka jingjia ba sngewsih—u contractor, ka tnad, ne ka sorkar hi.
Ka jingsngewkhia kaba kham jur ka dang sah hato ka sorkar jylla kan leh da kaba tyngeh ne em ïa ka Brahmaputra Infrastructure Limited, kaba la shah kynnoh ba ka la shim kabu ïa ka pisa paidbah ha ka dur jong ka kam pynroi. Kane ka jingjia sa shisien kala pynmih ia ki jingkylli kiba pynkhuslai shaphang ka jingbamsap bym lah ban tehlakam ha ki projek kiba bun klur kiba la pynlong ha ka kyrteng jong ka jingkiew shaphrang.
