Guwahati, Lber 11: Shuwa ka elekshon sha ka iing dorbar thawain jong ka jylla Assam, ka sorkar Assam ka la mynjur ban pynrung ia ki 37 tylli ki jaitbynriew rep slasha jong ka Assam ha ka kyrdan Other Backward Classes (OBC).
Kane ka sienjam ka long ban kyntiew ia ka hok ha ka imlang sahlang bad ban pynkhlain ia ka hok bad ka jingbha jingmiat jong ki nongshong shnong ha ki kper slasha.Ka wanrah ruh ia ka rukom ai jingpynskhem arsien kaba ryntih ban pynsuk ia ka jinglah ban ioh ia ki jingpynskhem OBC bad ki jingmyntoi kiba iadei bad kane.
Haba kren sha ki nongthoh khubor hadien ka jingialang jong ka kynhun myntri, u myntri rangbah ka Assam u Himanta Biswa Sarma u la ong, “Kine ki jaitbynriew kham mynshwa la khein kum ki jaitbynriew rit paid. “Mynta, yn ai ia ki ia ka kyrdan OBC kaba laitluid.Ka tnad Social Welfare kan sa pynmih ia ka jingpynbna shen,” u la ong.
U Lakhindra Kurmi, general secretary jong ka Assam Tea Tribes student’s Association (ATTSA) u la ong, “Ka dei ka rai kaba bha bad ngi pdiang sngewbha ia ka rai jong ka sorkar Assam ban ai OBC ia ki 37 tylli ki jaitbynriew kiba don ha ka kper slasha kiba sah ha Assam.Kham mynshwa, kine ki jait bynriew kim don kano kano ka syrnod bad mynshwa kidei ki sub-cast hynrei mynta la tip ia ki kum ki OBC”.
Lait na kiwei pat ki jingmyntoi, mynta kine ki jaidbynriew kin ioh ia ki jingmyntoi hapoh ka OBC.
Kine ki rai jong ka sorkar Assam shwa ka elekshon sha ka iing dorbar thawain ha kane ka jylla kin ai ia ka jingbha ne iarap ia ka sorkar namar ba ki jaitbynriew tea tribe ha kane ka jylla kin don ka bynta kaba donbor ha ka por elekshon.
“Ngi pdiang sngewbha ia ka sorkar Assam kaba la ai OBC ia ki 37 tylli ki jaitbynriew slasha.Ka dei ka rai kaba bha bad ngi sngewkmen na ka bynta kata,” la ong uwei pat u nongialam jong ka ATTSA.
Ka jaidbynriew tea tribe jong ka Assam ka la dawa ia ka kyrdan ST na ka bynta katei ka jaidbynriew.Ka kyrdan ST ka dei ka jingdawa kaba la ap slem bha jong ki jaitbynriew jong ka Assam.
Ki jaidbynriew tea tribe ne slasha ki la wan buhai shnong na Jharkhand ha ka por ba synshar phareng bad naduh katei ka por ki la shong la sah ha Assam bad ki la pyniasoh bad ki karkhana slasha.
.){kind=link}