Guwahati, Jymmang 28: Ka kynhun Myntri Sorkar ka Jylla Assam ka la mynjur ia ka rai ban ai laisen ban buh tiar siat sha ki nongshong shnong ha ki jaka ba jngai, ki jaka kiba lah ban mih kino kino ki jingjia, bad ki jaka khappud jong ka Jylla.
Ia kane la pynbna da u Myntri Rangbah ka Jylla Assam u Himanta Biswa Sarma haba kren shaki lad pathai khubor ha Lok Sewa Bhawan ha Guwahati.
U Myntri Rangbah u la pynpaw ba ia kane ka rai la mynjur ban pynkupbor ïa ki nongshong shnong trai ri kiba sah ha ki thaiñ kiba mad jingeh haka shong suk shong shngain haki thain khappud.
“Ngi la shim ia ka rai ban pynshlur ia ki briew kiba sah ha ki jaka ba jngai, kiba rit paid, bad ki jaka khappud ban pan laisen ban buh tiar siat, katkum ka jingbit bad katkum ki kyndon jong ka Indian Arms Regulations” u la ong. “Ki paidbah ka Assam ki tip bha kino ki jaka kiba hap hapoh ka kyrdan kiba rit paid. Kine ki dei ki jaka ba ki nongshong shnong ki sngew ba ki don ha ka jingma ha ka liang ka jingim bad ka jingdon jingem.”
U Himanta u la ban jur ba yn pynbeit ïa ka rukom treikam ban ai Laisen da ki Deputy Commissioner kiba don jing tip bha ïa ka jinglong jingman jong ki thaiñ jong ki.
“Kane kam dei ka kam kaba eh ha Assam, shisien ba ngi la shim ia ka Cabinet Memorandum, iaka jingpyntip ym pyndep hapoh 24 kynta” u la bynrap.
Ka Sorkar ka thmu ban pyntip shen ia ki kyndon thymmai, kaba pynlah ia ki briew kiba dei hok ha ki jaka ba rit paid ban pan laisen buh tiar siat da kaba suk.
