Guwahati, Risaw 09 : U Myntri Rangbah ka Assam Himanta Biswa Sarma ha ka sngi Nyngkong, ula pyntip ba ha kine ki hynriew bnai ban wan, ka Sorkar Pdeng kan sa weng noh pura ia ka Armed Forces Special Powers Act (AFSPA) napoh ka Jylla Assam.
Haba iakren bad ki nongthoh khubor, u Himanta ula ong “Ngi la ai jingmut ia ka Sorkar Pdeng ban weng noh ia ka AFSPA na ki phra tylli ki District ka Assam hynrei ia mynta la weng shuwa tang ha ki 4 tylli ki District ba kynthup ia ka Jorhat, Golaghat, Karbi Anglong bad Dima Hasao”.
“Mynta ka AFSPA ka dang don satang ha ki saw tylli ki District kata ha Dibrugarh, Sivsagar, Tinsukia bad Charaideo. Ha kine ki hynriew bnai ban wan, ka Sorkar India kan sa nang bishar ia ka jinglong jingman bad kan sa weng noh shisyndon ia ki shipai na ka Jylla” ong u Himanta.
Ula bynrap “Nga tharai ka Sorkar Pdeng ka hap ban phubor bha namar haba ngi ong ban weng pura noh, ngim ong ban ia weng noh mar mar. Ki ong ba ngi hap iaid da ki bynta bynta”.
“Ki shipai hi kiba pynbor ia ngi ban weng noh ia ka AFSPA namar ha ka jingbishar ki shipai, ka Assam kala shngain bha. Ka Sorkar India ka don la ka jong ka jingpeit ia ka jinglong jinglong bad ka kwah ia ngi ban pynbteng shuwa ha ki saw tylli ki District ia mynta” ong u Himanta.
Ia ka AFSPA la pyntreikam nyngkong eh ha Assam ha u Naiwieng 1990 bad la pynjlan manla ka hynriew bnai naduh katei ka por hadien ka jingbishar ia ka jinglong jingman da ka Sorkar Jylla.
 napoh ka Jylla Assam.){kind=link}