Assam | Pyntip u CM ba jan dep ka jingpynbeit iasam Constituency hapdeng ka BJP bad AGP

Guwahati K’Lyngkot 24: U Myntri Rangbah ka jylla Assam Himanta Biswa Sarma ha ka sngi Saitjain u la ong ba ka jingiakren ban ia pynbeit seat hapdeng ka Bharatiya Janata Party (BJP) bad ki paralok ba iatreilang-ka Asom Gana Parishad (AGP) mynta ka lah jan dep ha kaba la khmih lynti ban pynbna paidbah shen.

Haba shim na ka X, u Sarma u la ong, “Ka jingïakren ban ïasam seat hapdeng ka BJP bad ka AGP ka la jan kut bad ngin sa pynbna paidbah ha kine ki sngi ban wan. Ryngkat ka Team NDA kin pan ïa ka jingkyrkhu na ki paidbah ka Assam.”

Haba kren ha ki nongthoh khubor, u myntri rangbah ka jylla u la ong ba ki jingiakren ba nyngkong ki la dep ban kut.“Ka jingiakren ban iasam seat hapdeng ka BJP bad ka AGP ka la jan kut.U state President ka BJP u Dilip Saikia bad u myntri sorkar u Jayanta Malla Baruah ki la ia iakren bad ka AGP.Ynda u myntri kam poh iing ka sorkar pdeng u Amit Shah u la rai ban pynkut noh ia ki jingiakren, ngin sa pynkut noh mardor ia ka, ong u Sarma.

U President ka AGP, u Atul Bora, kham mynshwa u la ong, ba ka party kan buh hakhmat eh ïa ki shuki ha kaba ki kyrtong jong ka ki don ka lad kaba khlaiñ ban jop bad pynskhem biang ïa ka jingangnud jong ka AGP ban bteng kum ka paralok ba kongsan jong ka BJP hapoh ka National Democratic Alliance (NDA) ha ka elekshon sha ka Ïingdorbar Thawaiñ ban wan.

Haba kyntait ban batai bniah katno tylli ki seat ba ka AGP kan ïakhun, u Bora u la ong ba ka seng ka la pynkhlain ïa ka nongrim seng jong ka ha ki katto katne ki konstitwensi bad u la kdew ba ki don ki MLA na ki jaitbynriew rit paid dang shen kiba la pynpaw ba ki kwah ban ïasoh bad ka AGP.

Baroh ar tylli ki party ki la rai ban iakhun lang ha ka elekshon sha ka iing dorbar thawain ka jylla Assam ka ban wan bad ki la pynjur ia ki jingialang ban pynbeit bad ka jingpyrshang ban iatreilang.

Da kaba sah sa tang ar bnai tam shwa ban pynbna ïa ka elekshon, ka BJP bad ka AGP ki paw ba ki ïaid da kaba husiar, kaba pyni ïa ka jingïatylli katba ki dang pynïahap ïa la ki jong ki jong ki jingmyntoi jong ka seng.