Guwahati, Lber 10 :Ki nongmihkhmat ka liang pyrshah mynta ka sngi 10 tarik ki la pynthut ia ka jingkren jong u Lat ka Assam u Gulab Chand Kataria hapoh ka iingdorbar assembly namar ka jingkynthoh bam doh ksew jong u MLA ka Maharashtra.
Namar ka jingiapyrta bad hylla, u Kataria u la hap ban sangeh ia ka jingkren kaba la iaid kumba 15 minit ha ka sngi kaba nyngkong jong ka dorbar mangtyngka, kata hadien ba ki liang pyrshah ki la ieng bad pyrta pyrshah, bad ban ioh jingtip la ka la don ne em ka sienjam jingpynshitom pyrshah ia utei u MLA ka Maharashtra.
Ha kine ki khyndiat sngi ba la dep, u MLA ka Maharashtra u Bachchu Kadu u la tyrwa hapoh ka iingdorbar assembly ka Maharashtra ba ia ki ksew surok dei ban phah sha Assam khnang ban lah ban khanglad ia ka jingroi ka jong ki, da kaba ong ba ki trai shnong ha kane ka jylla ka thain shatei lammihngi (Northeast) ki dei kiba bam doh ksew.
Katba u Kataria u dang sdang ban kren, u MLA ka Congress u Kamalakhya Dey Purkayastha u la rah ia kane ka mat, kumjuh na ka liang u nongthaw ain na ka kynhun shimet u Akhil Gogoi ruh u la ong ba kane ka mat ka dei ban mih ha ka jingkren jong u Lat.
Kumta ruh namar kane ka jingkhihwin, u Kataria u la hap ban pynkut noh ia ka jingkren ka jong u kaba dang marshiteng.
