Assam | Pynpra ka Sorkar ia ka IIHM Guwahati ban tehlakam ia ka jingshlei um

Guwahati, Naitung 21: Ka sorkar Assam lyngba ka sienjam ban weng ia ka jingeh na ka jingshlei um hapoh ka nongbah, ha ka sngi Nyngkong kala pynpra noh ia ka International Institute of Hotel Management (IIHM) kaba don ha Cachal, Guwahati.

U Myntri Sorkar ba peit ia ka tnad Housing bad Urban Affairs, u Jayanta Malla Baruah,haba leit ban jngoh ia katei ka jaka ula ong ba ka sorkar kala sdang ia ka kam ban pynioh biang ia ki jaka langum (wetland) ban weng ia ka jingeh na ka jingshlei um ha Guwahati.

“Lah don katto katne ki jaka la bat bad ba pyndonkam da ki jaka ai jingpule bad ki don ruh da ki riew shimet bad ki don ruh ba la ai da ka sorkar ba kynthup ia ka IIHM, ka jaka treikam ba la pynïaid da ka sorkar pdeng, kaba la lap ba la tei halor ka jaka langum,” ong u Baruah ha ki lad pathai khubor.

Shuh shuh u Baruah ula ong, “Ban weng ia ka jingeh na ka jingshlei um ha sor, nga la buh ia ka thong ban ioh haduh 400 acres ka jaka ba langum ban sdang ia ka kam bad ngi la sdang ban pynpra noh ia ka IIHM mynta ka sngi. Kane ka jaka ai jinghikai la pynkynriah noh sha GS Road, bad ia ka hostels pynkynriah sha ka shnong Games ne ka Games Village, bad la ai ruh ia ka jaka ha Sonapur ha kaba ka tnad BWD kan pynshna da kaba thymmai na ka bynta jong ki.”

U Baruah kala pynpaw ruh ba ki don ar tylli ki jaka langum kiba kongsan ba kynthup ia ka Silsako bad ka Deepor Beel kiba la shah ktah ha kine ki khyndiat snem kaba la pynthut pat ia ka jingtuid um ki nala hapoh ka nongbah.

“Kine ki jaka langum, ki pynlang lut ia baroh ki um kiba la palat ha Guwahati ia ka ban sa tuid sha ka wah Brahmaputra, hynrei namar ka jingjur jong ka jingwan ban kyntur bad kane ka la pynduna bha kaba lam pat sha ka jingshei um bad dei na kane ka daw ka sorkar ka shim khia bha ban pynlang ia ki tynrai jong ki tyllong um” u la ong.

Ka state urban development strategy, mynta ka ialeh ban pynkhie im biang ia kine ki jaka langum ne ki wetland ban pyntikna ia ka jingpyniaid ia ka um kaba neh bad ka ban lah ban pynduna na ka jingma jong ka jingshlei um ki paidbah nong shong shnong ha sor.