Assam | Pynkut noh ki kynhun Kuki SoO ia ka kam kiengatiar hadien ka jingiasoi soskular iasuk

Guwahati, Lber 24: Ka jingsuk bad ka jingshong shngain kaba neh kala sdang wan ha Assam, hadien ba ka kynhun Kuki Suspension of Operations (SoO) ki la pynbna ban pynkut noh ïa ka jingkieng atiar hadien ka jingsoi ïa ka soskular bad ka Sorkar Assam bad ka Sorkar India ha ka 15 tarik u Lber, 2026.

Ki kynhun—kiba kynthup ïa ka Kuki Revolutionary Army (KRA), ka United Kuki Defence Army (UKDA), bad ka Kuki Liberation Army (KLA/KLO)—ki la pynmih ïa ka statement ne ka jingkynthoh kaba pynpaw ïa ka jingsngewnguh kaba khraw ïa baroh ar ki tylli ki sorkar kata ka sorkar jylla bad ka sorkar pdeng na ka bynta ka jingpyrshang ba radbah jong ki ban don ka jingsuk, ka jingïakren, bad ka roi ka par kaba kynthup lang ïa baroh.

Haba batai ia kane ka jingiateh kum ka histori bad ka jingkylla, ki kynhun ki la ong ba ka pyni ia ka jingkylla kaba mut na ka jingialeh sha ka jingiatreilang, kaba plie ia ka lynnong ba thymmai jong ka jingshaniah markylliang, bad ka jingpyniasuk ia ka sain pyrthei ha ka thain.

“Da kaba bud ryntih ïa ki jingbthah jong ka sorkar bad ki kyndon jong ka jingïateh kular, ka KRA, UKDA, bad ka KLA/KLO ki ieng skhem ban pynduh noh da kaba pyntreikam noh mardor,” ong ka kyrwoh bad bynrap ba baroh ki kynhun ba ïasoh la pynduh noh naduh ka 23 tarik u Lber, 2026.

Ki seng ki la bthah ia baroh ki dkhot ba kin mih noh na ki jaka sah ne ki ktem, ban leit phai noh sha la ki jong ki iing ki sem, bad ban im kum ki riew paidbah da kaba bud pura ia ka riti synshar ka ri India.La kyntu ruh ia ki dkhot ban pyniasoh biang bad ka imlang sahlang bad ban noh synniang sha ka jingsuk bad ka roi ka par.

Da kaba khot ia ki dkhot, ki nongkyrshan, bad ki nongiarap ban bat ia ka mynsiem jong ka jingiateh, ki kynhun ki la kyntu ia ka jingiatreilang kaba pura bad ki bor synshar ha kaba pynneh ia ka jingsuk jingsain.Ki la kyrpad ruh ia baroh ki bynta jong ka imlang sahlang ban pdiang ia kane ka bynta kaba thymmai da ka jingiatylli, ka jingiasuk, bad ka jingkyrmen.

Haba kren shaphang ki jingeh ba la pynpaw ha ki katto katne ki bynta, ki kynhun ki la ong ba la pynbeit ryntih ïa ki jingdawa jong ki khnang ban lait na ki jingïakynad kiba lah ban mih bad kiwei pat ki jaidbynriew.Ha ka jingmyntoi jong ka jingïatylli, ki la kdew, bad la buh kyrpang ïa ki jingdawa ba kongsan—kynthup ïa ka jingthmu ban thaw ïa ka Kuki Tribes Autonomous Regional Council ha Karbi Anglong bad ka Borial District district kaba la ka jong ha Dima Hasao.

Ki la bynrap ba ïa ki jingtyrwa kum ka jingthaw ïa ki seat ba thymmai jong ka MAC yn sa bud tang hadien ba la ïamir jingmut bha bad baroh ki nongia don bynta lang ban pynthikna ïa ka jingïatylli bad ka jingïasngewthuh jingmut.

Haba pynpaw ïa ka jingsngewkhia halor ka jingshah kynthoh dang shen, uwei u nongïalam u la khot ïa ki jingïakhih bad ki jingtieng na ki katto katne ki bynta kum “kiba phylla bad pynduh mynsiem,” da kaba kdew ba ïa ki jingpyrshah kiba kum kine ym shym la pynpaw ha ka por ba thaw ïa kiwei pat ki bor pynroi jong ka council.Hynrei ki kynhun ki la ong ba ka sorkar ka la shim ïa ka rukom treikam kaba ïahap, kaba pynbeit ïa ki jingeh jong baroh ki jaidbynriew ban pynlong ïa ka jingïateh kular kaba kynthup lang bad kaba khlem jingïakynad.

Ki kynhun ki la kyntu ia ka sorkar ban pynthikna ban pyntreikam pura bad ha ka por kaba biang ia baroh ki kyndon jong ka jingiateh, da kaba ban jur ba ka jingshaniah ha ka jingiasuk ka shong ha ka jingpyndep hok ia ki jingkular.

Kine ki kynhun ki la pynpaw ba uno uno u briew ne ka kynhun kiba kam ba ki trei ha ka kyrteng jong ki seng ba la pynduh noh yn kheiñ ba kim don bor shuh ne ioh bor, bad ba kin ym kitkhlieh ei ei na ka bynta kum kine ki kam.

Haba pynpaw biang ia ka jingkular jong ki na ka bynta ka jingsuk, ka roi ka par, bad ka jingbha jingmiat jong ki paidbah, ki kynhun Kuki SoO ki la pynpaw ia ka jingkyrmen ba kane ka sienjam kan plie lad ia ka lawei kaba skhem, kaba iadei, bad kaba roi na ka bynta baroh ki jaitbynriew ha Assam.