Guwahati, Naitung 10: Ki bor District ka Goalpara kala pynkhreh ban kyndang ia ki Iing beain ban shim biang iaka jaka kaba heh palat 140 acre ha Paikan Reserve Forest kaba don ha Goalpara Assam.
Ia kane ka jingkyndang la buh ban sdang ha ka 11 tarik u Naitung hadien baka jingaipor ia ki briew ba kin mih na kane ka khlaw kan kut noh ha ka 10 tarik Naitung.
Ka Paikan Reserve Forest ka heh haduh 711 hectare, ha kaba 140 hectare la shah kyntur haki briew ba sah beain.
Katkum ka jingong jong ki heh ka tnat Forest, kane ka bynta jong ka khlaw ka dei kaba kongsan bha, bad ki jingpynlong shnong khlem jingbit ka la ktah jur ia ka sawdong sawkun jong kane ka khlaw.
“Ka jingheh ka jaka ka long 138 hectare, kaba iaryngkat bad 1,031 bighas. La aipor ban ia kine ki iing beain hapoh ka 10 tarik Naitung ba kin pynkynriah noh. Nalor ki Iing beain, ki don ruh saw tylli ki skul Primary ka Sorkar, kawei ka skul primary ki riew shimet, 5 tylli ki anganwadi centres, 8 ylli ki mosques, 5 tylli ki jaka tep briew bad 3 tylli eidgahs” ong u heh Sorkar.
Ka bor synshar jong ka Dhubri district dang shen ka la pynlong ia ka jingkyndang iaki longiing naka jaka kaba heh 3,500 bigha.
U nongaiktien ka BJP u Pankaj Borbora, u la kynnoh ba ki sorkar Congress kiba la dep, na ka bynta ka jingioh nong politik, ki la pynshong ia ki briew kiba dei na East Bengal, ha ki jaka ba la iada bad pynleit jingmut ha ka jingpynsngewbha.
U la ong ba ka BJP ka thrang ban ïada ïa ka hok bad ka lawei jong ki trai ri trai muluk Assamese.
U MLA ka Sivasagar uba dei u nongialam ka Raijor Dal u Akhil Gogoi ruh u la leit jurip ia katei ka jaka hynrei u la shah bat noh ha ki pulit.
Haba khot ïa kane ka jingshah beh shnong ka long kaba be-aiñ bad kaba pyrshah ïa ka riti synshar ka ri, u Gogoi u la ong, “Kane kam dei kaei kaei hynrei ka jingleh bein ïa ki jaidbynriew rit paid. Nga la kren shai ba ki briew kiba shah ktah ki dei ban ïoh ïa ka bai lutksan kaba hok.”
