Guwahati, Iaiong 30: Ki pulit ka Kokrajhar kila kem noh ia u briew uba la shah set patok halor ka jingkynnoh ba u donkti ban leh beijot ia kawei ka khynnah ba dang rit ka rta, bad hadien ba u la mih na patok u la pyniap ia kawei ka briew kaba kynnoh ia u ba u thmu leh beijot ia kawei ka khynnah rit.
Kane ka jingjia ha ka shnong Batabari kaba hap hapoh ka Runikata police station ha Assam, Kokrajhar ha ka miet sngi ba-ar kumba ha ka por 8 baje.
Katkum ka jingiathuh ki trai shnong la iathuh ba une u briew la tip kyrteng kum u Mukha Basumatary(30) u la pyniap ia kawei ka kynthei ka Chubila Basumatary(40) kum shi bynta kum ka kput ba phah ia u sha patok.
“U Mukha Basumatary u la shah kem ha kaba iaei bad ka case jong u snem 2023 ha kaba u la pyrshang ban bat bor ia kawei ka khynnah ba dang rit.Kiba ha iing jong ka Chubila Basumatary kala ai case pyrshah ia u Mukha. U Mukha hadien ba u la ioh jamin na Patok u la wan beit beit sha iing jong ka Chubila Basumatary bad u la pyniap dusmon ia ka”, la ong ki trai shnong.
U la ong, “U lok jong kane ka longkmie um shym la don ha iing ha ka por ba kane ka jia kala jia bad u Mukha Basumatary u la shim kabu bad pyniap ia kane ka longkmie kum ka kput ba ka phah ia u sha patok.”.
“Ngi la kem noh ia une u briew ba pyniap ia kane ka briew bad ka jingtohkit ka jong ngi ka dang iaid sha khmat bad ia mynta ngi pat lah ban ong eiei than halor kane ka jingjia namar ba ka jingtohkit ka dang iaid” la ong u wei u pulit phisar.
Shuh shuh u la ong, “Ia kane nga la dep ban phah leh ia ka post mortem bad ngi la sdang ia ka jingtohkit ka jong ngi”.
