Boko, Naiwieng 30: Ka jingiaid ki klai hapoh ka surok bah ne ka National Highway 17 kala shu sahkut beit ha ka dheng kali la kumba katto katne kynta, namar ba ki dkhot jong ka Kamrup District Rabha Students’ Union, ia kaba la kyrshan lang da ki ka katto katne ki seng, kila pynlong ia ka jingphakhnag surok ha Kenduguri kaba hap hapoh Boko.
Kine ki nongiakhih kila ia pyrta shla da ki slogan pyrshah ia ka sorkar, da kaba pynpaw ia ka jingpyrshah jur ia ka jingtyrwa jong ka sorkar kmie ban pynioh ne ai kyrdan riewlum ne ka tribal statud sha ki hynriew tylli ki jaitbynriew.Ki nongiakhih ki la pynpaw ia ka jingtieng ba kum kane ka jingleh kan pynduh ia ka hok bad ka jingmyntoi jong ki kynhun riewlum kiba la don lypa.
Kum ka dak jong ka jingialeh pyrshah, ki nongiakhih kila thang ia ki copy jong ka ministerial committee’s report ha ka por ba pynlong ia kane ka jingiakhih. Ka jinglong jingman ka la kylla long kaba sniew da ki jingpyrta pyrshah sorkar kiba la sawa ha kylleng ka thain, wat la ym shym la don kano kano ka jingjia kaba sniew.
Na ka liang ki pulit na Boko ki la don ha katei ka jaka ban peit bniah ia katei ka jingiakhih bad ban pynthikna ia ka suk ka sain. La weng noh ia ka jingkhang surok hadien katto katne por, kaba la wanrah biang ia ka leit kawan jong ki kali ha ka surok bah.
Ka Rabha Students’ Union kala ieng skhem ha la ka jong ka nongrim ba kane ka jingthmu ne ka jingtyrwa ban pynrung hapoh ia ki hynriew tylli ki jaitbynriew ha ka thup Scheduled Tribe kan pynduna ia ka jingiada na ka riti synshar jong ka ri ba ki trai ri trai muluk ki ioh.
