Dibrugarh, Naiwieng 30: Ka Child trafficking ne ka jingshah khaii ki khynnah ha ki thain ka kper slasha ha Upper Assam kala kylla long ka mat ka sngewkhia ha kine ki khyndiat snem kiba la leit, ha kaba ki don shibun ki khynnah rit kila shah rahbor ne ki shah pynngop bad shah khaii sha kiwei pat ki jylla ba marjan ha Arunachal Pradesh.
Ki pulit jong ka Dibrugarh ha ka sngi Palei kila kem ia u wei u nongkhaii ba bna nam bha ia uba la tip kyrteng kum u Vijay Patnaik (46), ha ka por ba ki dang pynlong ia ka operation ha Tinsukia railway station, da kaba ioh ban pyllait im ia lai ngut ki khynnah ba dang rit— ar ngut ki kynthei bad u wei u shynrang— tang ha shwa ba kin shah kit noh shabar jong ka jylla Assam.
La register ia kan ka case ha Lahowal Police Station, bad ha Patnaik kiba la pynngat hapoh ka Sections 137(2) (kidnapping) bad 143(5) (trafficking of persons) jong ka Bharatiya Nyaya Sanhita (BNS). Mynta une u briew u la don hapoh ka judicial custody.
Kane ka joint operation, la pynlong hapdeng ka kynhun na Chabua bad na Lahowal police stations, bad la sdang ia kane ka jingkhynra hadien ba la ioh ia ka jingtip ba tikna halor ka iaid ka ieng jong u Patnaik bad kiba la pyntip ruh sha ki bor ba dei khmih ne ki bor synshar. Une u briew ba shah kynnoh u dei uba shong basah ha Kadamoni, Chabua bad la ioh ban kem ia u katba u dang thmu ban kiew noh ha ka rel ha ryngkat bad kine ki khynnah rit.
“Ngi la kem noh ia une u briew na Tinsukia railway station ha ryngkat bad lai ngut ki khynnah rit na kti jong u.U don ka jingthmunban die ia kine shabar jong ka jylla Assam.Ngi la rah ia u hapoh ka custody bad ka jingtohkit mynta kala sdang,” ong u heh ophisar.
Katkum ka jingtohkit, la ioh jingtip ba u Patnaik u briew ba kongsan ba pyniaid iew ia kane ka kam khaii ia ki khynnah rit mynta lah slem bha, shuh shuh la kynnoh ruh ba u dei uba donkti ba kit ia ki katto katne ngut ki kynthei bad ki khynnah rit na Assam bad ialam pat sha kiwei pat ki jylla na ka bynta ka jingioh nong.Ki pulit kila ong ba ia u ki pulit kila peitngor lah slem bha.
Ha kawei pat ka khubor kaba ïadei bad kane, ki Pulit jong ka Tinsukia ha ka sngi Balang ki la kem ïa u Peter Sona, uba la ngeit ba u dei u mastermind ne u briew uba plan bad pyniad jong kawei pat ka kynhun khaii briew, na Phillobari. La suba jur ba u la khaii ym duna ia ka shiteng dorjon ki khynnah na ki kper slasha, sha Arunachal Pradesh.
“Dang ha kine ki khyndiat sngi, ki pulit kila ioh ban pyllait im ia ki katto katne ngut ki khynnah na ka kti jong kine ki nongkhaii briew bad ki don shibun ki agents kiba ia donkti bad la kem noh ia ki bad phah sha patok ban set ia ki,” ong sa u wei u heh ophisar.
Ki nongtrei mon sngewbha kila ong ba kine ki nongkhaii briew man ka por ki ju target ne thmu beit ia ki khynnah kiba wan na ki iing kiba duna ha ka ioh ka kot da kaba pynbiej ia ki bad kular thok ban pynioh kam na ka bynta ki khun jong ki.
“Bun ki khynnah ki lamih na la iing ban leit trei sha kiwei pat ki jylla hynrei ki kut noh ha ka jingshah riam, shah pyndonkam bakla, bad shah pynbor ban trei bylla.Ngi la pyllait im ïa kiba bun ki khynnah kiba kum kine ki bym lah ban wanphai hi dalade.Ka jingkhaii briew ka dei ka kam runar kaba la pynbeit ryntih kaba donkti bun ki leh ia kane ka kam,” ong u dkhot jong kawei ka seng treimon sngewbha kaba donkti ha ki kam pynlait im.
U Vice President ka ACMS u Nobin Chandra Keot u la ong ba kine ki nongkhaii briew ki ju shim kabu namar ka jingduna ki nongtrei bylla ha ka jylla ba marjan ha Arunachal Pradesh.
“Ka don ka jingduna ki nongtrei bylla ha Arunachal namar ka jingduna jong ki briew jong ka. Ki ju shim ia ki nongtrei na ki kper slasha jong ka Assam, hynrei kine ki nongtrei bunsien kim ioh pisa namar ba kiba pyntrei kim siew.Ngi dang pynmih ïa ka jingpyn sngewthuh (awareness) ha ki jaka rep slasha, hynrei don ki kmie ki kpa kiba dang phah ïa la ki khun ban leit trei,” ong u Keot.
