Guwahati, Nohprah 9: Katto katne ngut ki briew kynthup ruh ia ki pulit kila mynsaw ha Morigaon, Assam ha ka sngi Nyngkong ha kaba ki pulit kila bom da u lathi ia ki nongiakhih kiba dawa ban kynthup ia ka Tiwa Autonomous Council hapoh ka Sixth Schedule jong ka riti synshar ka ri India.
Ia kane ka jingiakhih, la pynlong da ka All Tiwa Students’ Union (ATSU), ha kaba la iohi ba da ki spah ngut ki nongiakhih kila khang ia ka lynti ne surok bah jong ka National Highway-27 ha Jagiroad da ki kynta da kaba pynbor ia ka jingdawa kaba la slem ka jong ki.
Napdeng ki mat ba kongsan ba la pynpaw da ki nongïakhih ka long ban pynrung ïa ka Tiwa council areas hapoh ka Sixth Schedule, ban pynher krad ia kiba wan shong bad kyntur beain ha ki tribal belt bad ki block, ka lad ioh kam ioh jam ia ki khun samla Tiwa kiba la nang la stad hapoh ka Tata semiconductor plant, ka jingpynlong ïa ka eksamin TET ba kyrpang ban thung nonghikai ia ka ktien Tiwa bad ban ithuh ia ki ‘Tiwa’ ha ka jaka jong u ‘Lalung’ hapoh ka Constitution’s tribal list.
U general secretary ka ATSU, u Tarun Madar, u la kynthoh ia ki sorkar ba la ialam da ka BJP ha Centre bad ha Assam, da kaba kynnoh ba ka dei ka jingleh klet ban pynbeit ia ki jingeh jong ka imlang sahlang. U la maham ruh ba lada ym lah ban pynbeit kloi ia ki jingdawa, ka jingiakhih kan nang pynjur naduh u bnai Kyllalyngkot.
“Ki nongiakhih ki la khanglynti ia ka surok bah da ki katto katne kynta bad ka la don ka jingdheng kali kaba jur bha. Ki pulit ki la pyrshang ban pyllait ia ka surok bah hynrei na ka liang ki nongiakhih ki pyrshah.Ki nongiakhih ki la kawang da ki maw katba ki pulit ki la pyndonkam da ki lathi bad ki bom pynsat khmat (tear-gas) ban pynpra ia ki paidbah,” la ong uwei u ophisar pulit.
