Guwahati, Jymmang 13: Arngut ki briew kila mynsaw jur na ka jingshah dait ha u khla thapsim ha ka thain Fatasim Ambari jong ka Nongbah Guwahati.
Kine ki arngut ki kyrteng u Suman Kumar Singh bad ka M Devi. Ia kine la pynkit noh mar mar sha Guwahati Medical College bad Hospital ban ai ka jingsumar.
Kat kum ka jingiathuh ki trai shnong, kane kala jia hynnin ka sngi Thohdieng ha kaba une u khla ula wan rung kynsan kynsan ha ka jaka paidbah ha Fatasil Ambari.
Ki bor Sorkar kila bthah ia ki nongshongshnong ka thain ba kin peitngor bha ia une u khla khnang ba kan nym don shuh kano kano ka jingjia kaba sngewsih.
Ha kajuh ka por, ka Tnad khlaw kala phah ia ki briew sha ka thain ban iawad bad kem ia une u khla.
“Ka jingiatakhuh bad pyni bor hapdeng ki mrad khlaw bad ki briew kala kiew bha ha Assam namar ka jingnang stang ki khlaw ki btap. Une u Khla ula mih na khlaw bad wan rung sha jaka briew ban wad bam” ong ki stad mariang.
