Guwahati, Jymmang 7: Ka Kynhun Myntri jong ka Sorkar Assam kala ai jingmynjur ia ka Assam Thermal Power Generation Promotion Policy 2025, ban pynlong ia ka jylla kum ka shlem jong ka jingpynmih ia ka Thermal Power da kaba buh ia ka thong ban pynmih bording kaba 5,000 MW hapoh u snem 2035.
Haba iakren bad ki nongthoh khubor ha ka sngi Baar, u Myntri Rangbah ka Assam u Himanta Biswa Sarma ula ong ba ka jingthmu jong katei ka polisi ka long ban pynthikna ba kan don ka jingpynmih kaba pahuh ia ka bording elektrik bad ban kyntiew ia ka jingiashimbynta jong ki kynhun ha kaba iadei bad ka kam pynmih bording.
Hapoh jong kane ka polisi kaba thymmai, ka Assam ka don ia ka thong ban ioh sa
2,000 MW lyngba ka Thermal Power hapoh u snem 2030 bad kyntiew shaduh sha ka 5,000 MW hapoh u snem 2035. Ka Assam Power Distribution Company Limited (APDCL) kala shah thung kum ka kynhun ne Nodal Agency ban pyntreikam ia kane ka polisi, kaba kynthup ruh ia ka Single-Window Clearance System kaba kyrpang.
“Ha u snem 2030, ka Assam kan donkam haduh 3,000 MW ka bording bad kane ka jingdawa kadei kaba la khmih lynti ba kan dang kiew shuh shuh sha ka 5,000 MW hapoh u snem 2035. Da ka jingkiew kaba man la ka snem kaba kot 1,000 MW ha ka jingdonkam ia ka bording bad ka jingbym bun ki lad ban pynmih ia ka bording lyngba ki Hydropower Project kiba heh, kumta ka lad kaba ngi don kadei tang da ka Thermal Power” ong u Sarma.
Ka polisi ka ai bun ki jingmyntoi kiban khring ia ki kynhun bad ki kompani ban wan kynshew pisa, kaba kynthup ia ka jingai ei ia ka jaka, ka jingpynpoi ia ka um da ka sorkar jylla bad ban pynbha ia ki surok ha ka leit ka wan.
Watla ka jylla kan thied ia ka bording lyngba ka jingthep da ka tender, hynrei ka don ruh ia ka jingbhah ia ka hok ban ioh haduh 27% ka bhah na ki projek jong ki kynhun shimet lada donkam. Man la ki 1,800 MW Power Plant kin donkam ban pynlut pynsep kaban kot ia ka T.20,000 Klur.
Ia ka jaka lah dep ban ithuh ha Rupsi, Dhubri bad Chapor bad man la ki Thermal Power Plant kin donkam kumba 300 bigha ka jaka.
U Sarma ula ong ruh ba ka bording kaba la pynmih lyngba kine ki projek kadei ruh kaba lah ban shalan sha kiwei pat ki jylla bad ki ri.
Ka Kynhun Myntri kala mynjur ruh ia ka T.300 Klur ka Subsidy ia ka APDCL ban pyllait ia ki paidbah kiba pyndonkam ia ka bording hapoh jong ka Jeevan Dhara bad ha ka kyrdan Domestic-A na ka bynta u snem 2025–26. Nalor kane, sa T.200 Klur la bhah kum ka Subsidy ban kiar na ka bynta ban pynkiew ia ka dor jong ka bai bording. Kane ka pisa kan long kum ka jingpynsiew sha ka discom na ka bynta ban pynduna noh T.1/unit kaba la sdang ha u Iaiong.
U Myntri Rangbah ula ai ksai ruh ba ba kan sa don ka jingpynkylla ia ka dor jong ka bai bording ha u Naiwieng.
Ha kawei pat ka rai, ka Kynhun Myntri kala pyllait ia ka T. 244 Klur ban thied ia ka jaka ban kyntiew ia ka 220 KV grid substation ha Sarusajai Guwahati, kum shi bynta jong ka jingshimkhia ban pynkhlain ia ki jingtei ha kaba iadei bad ka kam bording.
Lyngba katei ka polisi treikam kaba thymmai ha ryngkat bad ka jingai ia ki jingmyntoi, ka sorkar Assam ka thmu ban buh ialade ha ka kyrdan kum kata kaba lah ban pynmih bun ia ka bording ha ka thain bad da kaba shimkhia ruh ia ka jingkiew jong ka jingdawa ia ka bording bad ban kyntiew ruh ia ka jingroi jong ka jingseng ia ki karkhana.
