Guwahati, Rymphang 16: Ka long shisha ka jingduh nong ba khraw eh ïa ka seng Congress namar ba ha shwa ka election sha ka iing dorbar thawain jong ka jylla Assam, u Bhupen Bora, nongialam ba rangbah jong ka seng Congress, u la iehnoh ia ka seng Congress.
U Bora, ula aiti ia kashithi iehnoh kam jongu, ha u Mallikarjun Kharge, president ka seng Congress bad ha U Rahul Gandhi, nongialam ba rangbah.
Hadien ba u la dep ban aiti ïa ka jingiehnoh kam jong u, u Bora u la weng noh ïa ka jinglong Congress jong u na ka social media jong u ha ka X (Twitter mynshwa), ka jingleh kaba la ïohi paidbah kum ka jingpynpaw shai ïa ka jingphet noh jong u na ka seng.
U Bora u la aiti ia ka shithi risain jong u mynta ka sngi tang hapoh katto katne sngi hadien ba ki heh jong ka seng ki la aiti ha u ia ka jingkitkhlieh ban thaw ia ka jingiateh lok na ka bynta ka elekshon sha ka iing dorbar thawain ban wan.
U Bhupen Bora u la long u President ka Assam Congress naduh u snem 2021 haduh u snem 2024. U la long MLA ar sien uba mihkhmat ia ka Bihpuria seat naduh u snem 2006 haduh u snem 2016.
Kane ka jingiehnoh kam jong u ka long tang ha shuwa ba ka General Secretary jong ka National Congress ka Priyanka Gandhi Vadra kan wan jngoh ia ka Assam kaba la buh ban long ha ka 18 tarik u mynta u bnai Rymphang.
Ki tyllong khubor jong ka seng ki la iathuh ba u Borah um sngewhun ia ka lynti jong ka jingpyrshang ka kynhun iatreilang jong ka liang pyrshah ha ka jylla.
Dang shen u la shah bynshet ban ialam ia ka jingialang ba kongsan jong ki seng kiba don ha ka liang pyrshah, ba kynthup ia ka Raijor Dal ba la ialam da u Akhil Gogoi bad kiwei kiwei ki seng na ka thain.
U la mih khmat ia ka Bishnupur constituency kum u MLA ka Congress naduh u snem 2006 haduh u snem 2016 bad la khein ia u kum uwei na ki khmat u ba paw jong ka seng ha kane ka jylla. Ha ka 24 tarik Naitung 2021, u la shah thung kum u president jong ka Assam Pradesh Congress Committee (APCC).
