Guwahati, Naitung 8: Ka jingkulmar kaba jur kala mih ha Dhubri District jong ka jylla Assam, ha ka sngi ba-ar na ka jingkyndang ia ki Iing ba shna beain ha ki jaka ka sorkar jylla.
Ki bor pahara kila mad ia ka jingpyrshah kaba jur na ki katto katne ki nong shong shnong jong ka Chapar revenue circle, ha kaba 3,500 bighas (kaba don palat kumba 540 hectares) jong ka jaka la lah ban pynkhuid ia ka jaka na ka bynta ban tei ia ka thermal power project kaba don ka jingiadei bad ka Adani Group.
Kane ka jingpynkynriah ia ki briew ba wan shong beain, kadei kawei ka jingpynkynriah kaba heh tam hapoh ka jylla Assam ia kaba la pynlong ha kylleng jong ka Dhubri bad Goalpara districts bad la khmih lynti ba ki long iing ki ban shah ktah ki long haduh 1,200–1,400 ngut na ki lai tylli ki shnong kiba hap hapoh ka jaka jong ka tnad revenue kiba hap hapoh ka Dhubri ha ka sngi ba-ar bad ha kawei ka jingkhynra ia kaba la pynbeit yn sa leh ha kane ka taiew ban kyndang ban pyllait sa kumba1,040 bighas ka jaka ba dei jong ka tnad forest, kaba pynkynriah jaka ïa ki 1,100 tylli ki long ïing.
Ka jingiakhih kala mih ha ki shong ba kynthup ha ka shnong Santoshpur, Charuabakhra bad ha Chirakuta ha kaba ki nongiakhih pyrshah kila ia tyngkhuh bad ki pulit lem bad ki ophisar sorkar. Na ka liang ki briew kiba pynlong ia ka jingiakhih kila kawang ruh bad pynjulor ia ki puh shilum bad kumjuh ruh ia ki kali sorkar. U heh ophisar jong ka district u la pynthikna ba kawei ka kali tih maw (excavator) kadei kawei na kiba la shah pynjulor.
Ban tehlakam ia ka jingkulmar, ki pulit ki la pyndonkam da ka lathi ban pynher krad ia ki paidbah bad la nang pynbun shuh shuh ia ki bor pahara. Katkum ka khubor na ki pulit, la ong ba ka jinglong jingman mynta la lah ban teh lakam.
Hynrei ki nongshong shnong ki la pynpaw ia ka jingbitar halor katei ka jingshah beh shnong, da kaba kynnoh ba ki la sah ha katei ka jaka da ki phew snem bad ki la kynnoh ba ka jingleh jong ka sorkar kadei kaba bakla bad ka ym dei satia.
Na ka liang ki bor pyniaid district jong ka Dhubri kila iada ia kane ka sienjam ba la shim da kaba pynskhem ruh ba kane ka jaka kadei kaba wan ban shong beain da ki snem bad mynta la donkam ban shna ia ki jingtei kiba hap hapoh jong ka Assam Power Distribution Company Limited (APDCL). Ki heh ophisar kila kyntu ia ki nong shong shnong ba kin ai ka jingiatrei lang na ka bynta ban pynkynriah bad kila maham ruh ban leh da ki bor jong ka ain pyrshah ia kito kiba khanglad bad ba pynthut ia kane ka jingthmu.
