Guwahati, Rymphang 17: Ka All India United Democratic Front (AIUDF) ka la mih jyndat noh bad boycott ia ka Dorbar Mang tyngka hadien ba ka Iing kala kyntait ban pynlong ia ka jingiatai ia ka adjournment motion jong ki-kaba iadei bad ka jingkynnoh pyndik ka Sorkar ia ki Miya Muslim.
Ki MLA ka AIUDF ki la pynlong ruh ia ka jingiakhih shabar jong ka iing dorbar Assembly.
Haba ïakren bad ki lad pathai khubor, u MLA ka AIUDF u Aminul Islam u la kynnoh ba u Myntri Rangbah ka Jylla u Himanta Biswa Sarma u ju thombor ïa ki jaidbynriew rit paid khamtam ïa ki Miya Muslim lyngba ki jingkren kiba pynkhihwin.
“Mynta ka sngi, na ka liang ka All India United Democratic Front, ngi la wanrah ia ka adjournment motion namar ba u Myntri Rangbah ka Jylla u pynshit ia ki briew ha ka kyrteng jong ki Muslim Miya, da kaba ong ba ki dei ban siew tang 4 lane 5 tyngka kum ka bai rickshaw”, la ong u Aminul Islam.
Shuh shuh u la kynnoh ba u Myntri Rangbah ka Jylla u kyntiew ïa ka sain pyrthei ban pawnam (polarization politics) ha Assam bad pyrshang ban wanrah ïa ka jingïapait hapdeng ki Hindu bad ki Muslim.
“U Myntri Rangbah ka Jylla u ju pynkulmar ia ki jaidbynriew rit paid.Kane ka sorkar ka trei tang ban pyndik ia ki.Teng teng ka BJP ka kren shaphang ki jingiasiat bad ka ong ‘No Mercy’ kaba thmu ia kawei ka jaidbynriew rit paid.Kane kam dei kaei kaei hynrei ka dei tang ban pawnam ha ka sain pyrthei”, u la ong.
U Aminul Islam, u iathuh ba ka AIUDF, ka la rah ia katei ka adjournment motion, katkum ka Rule 56 jong ka Assam Assembly Rules, da kaba pan ia ka jingiakren halor katei ka kam, namar ba ka don bynta bad ki jingkren ba la kren da u briew uba bat ia ka kam katkum ka riti synshar ka ri.
“Hapoh ka Rule 56, ka dei ban don ka jingiakren.Namar ba u don ha ka kyrdan riti synshar, kumno u lah ban kren kumne bad ban thew ia kawei ka jaitbynriew ha ka kyrteng jong ki Muslim Miya Bangladesh? Hynrei ym shym la ailad ia ngi ban iakren ia kane.Dei na kata ka daw ba ka kynhun jong ngi baroh kawei ka la khanglad ia ka Assembly bad ka la mih noh”, u la bynrap.
Ki nongialam jong ka AIUDF ki la pynpaw biang ia ka jingdawa jong ki ia ka jingpyniaid beit ha ka iing dorbar bad ki la kyntu ba ia kane ka kam dei ban iakren thikna ha ka iing dorbar.
 ka la mih jyndat noh bad boycott ia ka Dorbar Mang tyngka hadien ba ka Iing kala kyntait ban pynlong ia ka jingiatai ia ka adjournment motion jong ki-kaba iadei bad ka jingkynnoh pyndik ka Sorkar ia ki Miya Muslim.){kind=link}