Guwahati, K’lyngkot 25 : U Myntri Rangbah ka Assam Himanta Biswa Sarma ula kynthoh tyngeh ia ka ‘Bharat Jodo Nyay Yatra’ jong u Rahul Gandhi bad kynnoh ba ka jingthmu jong kane ka rally ka dei tang ban pynthut ia ka shongsuk shongsain ha Assam.
Ula ong ba u Rahul Gandhi mynta u don jingthmu ban pynlong ia ka Nyay Yatra ha Dhubri bad pynpaw ba um don satia ia kano kano ka jingpyrshah.
Hynrei, ula pynpaw paw ba ka Sorkar Assam ka lah ban phah kem ia u Rahul Gandhi hadien ka elekshon Lok Sabha namar lada kem mynta ka congress ka lah ban pynlong kam politics.
U Himanta ula kdew ba ki Pulit kila register ia ka case pyrshah ia u Gandhi bad ka SIT kan tohkit ia kane ka case haba iathuh ruh ba ka SIT kala lum lut ia ki sakhi satar.
Haba kdew ia ka jingjia ha Guwahati ha kaba ki nongkyrshan kila pynpaw ia ki jingker ki pulit da ka jingkynnnoh kynshoit Rahul Gandhi, u Himanta ula ban jur ia ka jingkut jingmut ban kiar ia ki jingleh politics shuwa ka elekshon Lok Sabha.
Lah ban kdew hangne ba u Himanta Biswa Sarma ula bthah ia u Director General of Police GP Singh ban register case pyrshah ia u Rahul Gandhi halor ka jingjia ha Khanapara, Guwahati.
Ki Pulit kila register case pyrshah ia u Rahul Gandhi, KC Venugopal, Kanhaiya Kumar bad kiwei kiwei hapoh ka kyndon 120(B)143/147/188/283/353/332/333/427 IPC R/W Sec. 3 of PDPP Act’.
