Guwahati, Lber 12 : U Myntri Rangbah ka Assam Himanta Biswa Sarma ula maham ia ki seng sain pyrthei ba kin khot ia ki pakhang shnong ban pyrshah ia ka Citizenship Amendment Act (CAA).
Kane ka jingmaham u Himanta kala mih hadien ka jingiohi ia ka jingpyrshah CAA ha Assam hadien ka jingpyn bna u Myntri kam pohiing ka Ri Amit Shah haba iadei bad ka jingthaw ia ki rule jong ka Act shuwa ka elekshon Lok Sabha.
Haba kdew ia ka hukum ka Gauhati High Court ba pynmih ha u Lber 2019, u Himanta ula kdew ba kino kino ki pakhang shnong kynthup ka pakhang surok ne lynti rel, ki dei kiba la khein beain bad ba long be-riti. Ula ban jur ba katba ka jingiakhih ka dei ka hok tynrai, ki seng sain pyrthei ki dei pat ban burom ia ka hukum ka Iingkashari.
U Himanta haba ban jur ba kam don jingmut ban iakhih pyrshah ia ka Bill bala mynjur da baroh artylli ki iing ka Parliament, ula pynpaw ba ki kynhun kiba sngew ba shah ktah na kine ki Bill ki lah ban leit wad jingiarap na ki Iingkashari. Ula ai jingmut ba lada don ki nongrim kiba ieng ban tyntuh ia ka CAA, ka Iingkashari Supreme Court ka lah ban tuklar bad ka Jylla ruh kan bud ia kaei kaba la hukum.
Lah ban kdew hangne ba ka CAA bala mynjur ha u 2019, kan ai jingithuh kum ki nongshongshnong ka Ri India ia ki briew kiba wan phet na Afghanistan, Bangladesh bad Pakistan namar ka jingshah thombor na ka jingiapher niam.
Ki Pulit ka Assam kila dep ai legal notice sha ki 16 tylli ki seng sain pyrthei namar ka jingkhot ia ka pakhang shnong mynta ka sngi pyrshah ia ka CAA.
.){kind=link}