Guwahati, Jymmang 28: Haba kynnoh ba jur ka jingpynibor ia ki nongshongshnong ka Ri India ha ka kyrteng ka jingpynithuh ia ki mynder ri, ka All India United Democratic Front (AIUDF) ha ka sngi Balang kala leit ban aiti da ka dorkhas sha u Lat ka jylla Assam ha Raj Bhawan, ba dawa ban tuklar ban pynkut noh ia kane ka kam beain.
Haba kren sha ki lad pathai khubor hadien ka jingiakynduh ia u Lat, u MLA uba dei ruh u General Secretary ka AIUDF Rafiqul Islam u la kam ba da ki spah ngut tang ha Guwahati marwei kila shah kem wat hadien kila pyni ia ki kot ki sla kiba biang.
U Rafiqul u la ong, “Ki nong shong shnong ka ri India kila shah thombor bad shah kem ruh tang da kaba shu tharai sniew ba kidei ki bar ri ne ki (foreigners),” u la ong. “Baroh shi iing ha ryngkat bad ki jingshisha kum ki sakhi satar kaba kdew ba kidei ki nong shong shnong ka ri India ki shah pynshitom beiñ, ha kaba don wat kiba shah pynher krad sha shiliang u pud.”
Da kaba pynpaw jong ka jingshah ktah ia ka hok long trai, u Islam u la buh ia u dak jingkylli kaei ka jingmut ba sha lyndet jong kane ha kaba ia ki riew shimet kiba dei na kajuh ka long iing kila shah niew kum ki bar ri, katba ki kmie kipa, ki para ki hymen ki khun ki kti baroh kidei ki nong shong shnong ka ri India. Kumno ka lah ban long ba tang u wei ne ar ngut na kajuh ka long iing la shah pynbna ba u dei u bar ri ha kaba baroh shi iing kidei ki nong India?’ u la kylli bad kyntu ia ka sorkar jylla ban sangeh mardor noh ia kane ka kam.
Shuh shuh MLA u Animul Islam u la pynpaw ia kane kajuh ka jingsngewkhia, da kaba kynnoh ba ki briew kiba duk bad kiba duna ha ka ioh ka kot ki kit ia ka jingkit ba khia jong ka jingshah pynshitom bein.
“Ki don shibun ki briew kiba la shah kem khlem da don ki kot ki sla kiba biang jong ka ain bad ki don kiba la shah ieh beain da ki sngi khlem da ioh ka bam, ka umdih lane halor ka khuid ka suba” ong u Islam, “hynrei lada don mano mano uba dei hok u bar ri, dei ban bud ryntih ia ka ain hynrei kane ka jingleh kam runar kadei ban kut noh”.
Shuh shuh u la kynnoh ruh ia ki bor pyniaid district ba wanrah ia kane sain pyrthei jong ka jingtieng (“politics of fear”) da kaba kam ba ki don kumba 100 ngut kiba shah suba ba kidei kiba wan shong ne rung beain la shah bat pat haduh 4 ne 5 spah ngut ban shah kylli jingkylli. “Ki paidbah kila shah pynbor ba kidei ban sei ia kot ki sla kum ka NRC bad kiwei ha ka jingshah pynbor bad u la kyntu ban pynkut noh ia kane ka jingleh donbor”.
