Dibrugarh, Nailar 15: U Sarbananda Sonowal, uba dei u Union Minister ba peit ia ka tnad Ports, Shipping & Waterways (MoPSW), u la kynnoh ia ka Congress ba kala pynthut ia ka Bharat naka jingiatylli, ka jinglong ba janai bad ka jingshngaiñ ha ka por ba don ka jingphiah ha u snem 1947, ha kaba u la ong ba ka la wanrah ïa ki jingia pynïap briew kaba ym lah ban mutdur, ki jingshah thombor ha ki million ngut ki briew.
Haba kren ha ka jingïalang jong ka “Partition Horrors Remembrance Day” ba la pynlong da ka Bharatiya Janata Party (BJP) ha Tinsukia District, u Sonowal u la ai burom ïa kito kiba la duh noh la ka jingim ha ka por ba jia ka jingjia ba sngewsih bad u la kynthoh jur ïa ka Congress halor kaei kaba u la khot ka jingbym shimkhia bad ka jingsngap jar jong ka ïa ka jingeh jong ki Hindu ha ka por ba ki Hindu ki don ha ka jingeh.
“Hapoh ka jingïalam ba ïohi jngai jong u Myntri Rangbahduh ka ri u Narendra Modi, kane ka dei ka por jong ka jingkhie im biang jong ka India — ka por ban plie lynti sha ka jaitbynriew kaba la roi, kaba lah ban shaniah ha lade, bad kaba roi,” ong u Sonowal. U nongïalam ka BJP u la kyntu ïa ki nongshong shnong ban shim ïa ka jingkular kaba ïatylli shwa ka sngi rakhe ia ka79th Independence Day.
U myntri u la ong ba ki jingma ba ia kynduh da ki rit paidbah jong ka niam, khamtam ki Hindu ha Pakistan ha ka por ba phiah ia ka ri, ki dang donkam ia ka jingpule kaba bniah bad ka jingpynsngewthuh paidbah. U Sonowal u la kynnoh ïa u Jawaharlal Nehru, u Muhammad Ali Jinnah, bad ïa ki nongïalam ka Congress ha kito ki por namar “ki la rai ia kiba bakla, ka jingbym ïohi jngai, bad ki sienjam pyrshah ïa ka jingïatylli,” da kaba pynïapher ïa kato ka por bad ki polisi jong ka sorkar ba la ïalam da ka BJP ha kine ki 11 snem ba la dep.
Katkum u Sonowal, ka sorkar ba la ialam da u Narendra “Sabka Saath, Sabka Vikas” kala wan ha ka bor ban trei kam ban pynthikna ïa ka jingshngaiñ, ka roi ka par, ha ka imlang ka sahlang. U Sonowal u la kynnroh ruh ba ka Congress ka la pynsangeh ïa ka jingkiew jong ka ri ha ka jingsynshar jong ka kaba 55 snem namar “ka jingbamsap bym kut, ki jingleh thok, ka saiñ hima sima, bad ki polisi ba pynïapher.”
Haba pyniahap ia ka jingsdang kum ka Make in India, u Sonowal u la pynpaw ïa ka jingroi ka ri India ha kaba iadei bad ka jingkhlain ha ka khaii pateng ne (export strength) na ki mobile phone haduh ki liengsuiñ ïapom bad ki namding. “Ka ri India mynta ka dei ka ri kaba saw ha ka ïoh ka kot ha ka pyrthei bad ka la pyni ïa ka jinglah jong ka ha ka liang ki bor shipai ha ka pyrthei lyngba ka Operation Sindoor,” u la ong. “Kane ka dei ka Amrit Kaal jong ka India — uwei pa uwei u nongshong shnong u dei ban don ka bynta kaba khlain ban saindur ia ka lawei ka jaitbynriew.”
Ha shwa jong kane ka sngi, u Sonowal u la ai burom da kaba leit buh syntiew ha u dur mot jong u nongiakhun laitluid u Piyoli Phukan ha Tinsukia, bad iaroh ruh ia ka jingshlur jong u bad ruh ban len lade pyrshah ia ka jingsynshar ki dohlieh. U la leh burom ruh ia u Netaji Subhas Chandra Bose, da kaba khot ia u “u nongïalam bym jutieng bad uba ka jingïohi jngai bad ka jingaiti lut jong u na ka bynta ka kam laitluid ka la ai mynsiem ïa ki million ngut.”
, u la kynnoh ia ka Congress ba kala pynthut ia ka Bharat naka jingiatylli, ka jinglong ba janai bad ka jingshngaiñ ha ka por ba don ka jingphiah ha u snem 1947, ha kaba u la ong ba ka la wanrah ïa ki jingia pynïap briew kaba ym lah ban mutdur, ki jingshah thombor ha ki million ngut ki briew.){kind=link}