Assam : Kynnoh u CM ia ka USTM ba wanrah jingshlei um ha nongbah Guwahati

Guwahati, Nailar 07 : Kawei ka skulbah kaba don ha khappud ka Assam-Meghalaya ka la kylla long ka matpdeng jong ka jingïakynad ym namar ka pule puthi, hynrei halor ka jingshlei um hapoh ka Nongbah Guwahati.

Halor ka jingeh jong ka jingshlei um ha Guwahati, u Myntri Rangbah ka Assam Himanta Biswa Sarma u la kynnoh ia ka University of Science and Technology Meghalaya (USTM) kaba la khang lynti ia ka jingtuid ka um na ki lum ka Meghalaya sha Guwahati kaba dei ka daw tynrai jong ka jingshlei um ha Guwahati.

Ka University of Science & Technology Meghalaya (USTM) ka dei ka skulbah ba nyngkong eh jong ka State Private University of Science & Technology ha baroh kawei ka thain shatei lam mihngi jong ka ri India. Ia kane ka University la kyrshan da ka ERD Foundation, Guwahati. Kane ka University ka dei kaba la seng ha khappud Assam-Meghalaya ha Baridua, 9th mile, mar pyrshah bad ka CRPF Camp kaba don ha Ri-Bhoi District jong ka jylla Meghalaya.

U Myntri Rangbah ka Assam ha ka sngi Thohdieng, u la pynpaw ba u thmu ban iakren ia kane ka kam bad u paralok jong u na Meghalaya u Conrad Sangma ban wad ia ka lad ban weng ia kane ka jingeh.

“Ngan sa iakren bad u Myntri Rangbah ka Meghalaya halor kane ka kam” ong u Sarma ha ki lad pathai khubor shabar ka passing out parade jong ki 981 ngut ki pulit ka Assam Forest Protection Force, kaba long ha Lachit Borphukan Police Academy, Dergaon.

“Ka USTM ka la tih ia u lum uba heh, da kaba shim kabu ia ka jaka jong ki ha Guwahati bad Meghalaya. Lada don mano mano ba leit jngoh ia ka USTM, kin iohi ba la weng palat 4-5 tylli ki lum ban shna ia ka skulbah,” ong u Sarma.

“Ha ka por ba seng ia kane ka skulbah, ka sorkar Assam ka la dei ban iakren ia kane ka mat bad ka Meghalaya. Mynshuwa ka um ka ju tuid suki suki na ki lum Meghalaya. Hynrei hadien ba la seng ia ka USTM, ka um ka tuid laki laka bad ka bym pat ju jia mynno mynno ruh sha ki jaka madan jong ka Guwahati,” u la ong ruh.