Guwahati, Jylliew 11: U Myntri Rangbah ka jylla Assam u Himanta Biswa Sarma ha ka sngi ba-ar u la kam ba ia ka doh masi la pynlong kum ka atiar ban ialeh pyrshah ia ki riew ngeit Hindu hapoh ka jylla, hadien ka jinglap ia ki lyngkhot doh masi ha ki jaka paidbah na ka jingrakhe ia ka Eid.
Haba kren sha ki lad pathai khubor u Himanta u la ong ba katei ka jingleh kadei ka jingthmu ban pynkhih win ban beh noh ia ki riew ngeit Hindu na ki jaka ba ia sah lang.
“Mynshuwa, lada don ki longïing Muslim kiba sah ha ka jaka jong ki Hindu, ki husiar bha ban ym wanrah ïa ka jingsngewsih. Lada ki kwah ban bam doh masi, kin leh kumta ha ki jaka ba bun ki Muslim. Hynrei mynta, ki bret ïa ki jingbam ba sahkut jong ka doh masi ha ki jaka ba lait, kaba pynbor ïa ki Hindu ba kin mih noh na kita ki jaka,” u la ong.
Na ka liang u Myntri Rangbah u la kdew ia kiba bun tylli ki jaka kiba jia kumne hadien ka jingrakhe ia ka Eid mynshem taiew, ba kynthup lang ia kawei ka jaka kaba don marjan bad ka Cotton University in Guwahati.
“Ban ka doh masi ha ka jingrakhe ia ka Eid kadei ka jingjied shimet, hynrei ban pyndonkam ban thew pat sha kiwei te un ym lah ban pdiang,” ong u Sarma bad bynrap ruh, “ Kane kam dei shuh tang ka bam hynrei la pyndonkam ia ka kum ka atiar ban ialeh ha ka sain pyrthei bad ha ka niam ruh.”
Shuh shuh u la pynpaw ba ba ki “Muslim kiba bha” kin ym leh ia kum kine ki jait kam. “Kim ju buh dur ba bat doh masi ha Facebook. La don tang lai ngut ki Muslim kiba la phone ia nga hadien ba lap ia kane ka jingjia bad ki ong ba kim mynjur satia” ong u Sarma.
Haba pynpaw ka jingsngewkhia ia kaei kaba u la batai, u Myntri Rangbah u la maham , “Lada kum kine kin iai bteng ban jia, hadien 20 snem yn leit ban bret da ka doh masi ha Kamakhya temple.”
Ha kajuh ka por, kala don ka jingiakynad ha western Assam jong ka Dhubri district hadien ka jingkynnoh ba la lap doh masi ha temple complex. Ki bor pyniaid ka district kila pynjari ia ka jingpyrkhing ha ka sor Dhubri ban lait na kino kino ki jingjia.
