Guwahati, Jylliew 16: Ki Myntri ka Sorkar Assam bad ki Heh Ophisar kila kut na ka jingioh bording ei namar ka Assam mynta kala pyndonkam pura da ka Solar ha Janata Bhavan, kaba pynlong ruh kum ka Secretariat ba nyngkong eh ka ban iaid ka jingtreikam da ka bor jong ka sngi.
U Myntri Rangbah ka Jylla Himanta Biswa Sarma ha ka sngi U Blei, ula plie ia ka Janata Bhavan Solar Project, ka project ba pynmih haduh 2.5 MW ha ka jingialang ba long ka Secretariat Complex.
Kane ka project kan pynmih haduh 3 lak unit ka bording ha ka shibnai ha ka jingkynshew pisa ba kot T.12.56 klur kaba la khmih lynti ban khyllie pat hadien ka 4 snem da ka jinglah ban kunai haduh T. 3 lak shibnai ka bai bording.
“Ka jingplie ia ka solar power project mynta ka sngi kala pynlong ia ka Assam Secretariat complex ban long ka Secretariat ba nyngkong eh hapoh ka Ri ka ban pyniaid ia ka jingtreikam da ka bor jong ka sngi. Kane ka project ka ban neh 25 snem, kan khate ia ka jingpynmih lyer jaboh (carbon emission) haduh 3060 metric ton shisnem bad 76,500 metric ton ha kine ki snem ba treikam ka project” ula ong.
U Himanta ula ong ba ka jingplie ia ka project ka dei kaban sah khana ha ka jingiad lynti jong ka Jylla ban pymih bording kaba khuid. Ula ong ba ka Sorkar Jylla ka ju siew kumba T.30 lak shibnai sha ka Assam Power Distribution Company Ltd kum ka bai bording ba pyndonkam. Ka jingpyndonkam noh da ka bording kaba khuid kan iarap ia ka Sorkar ban pyndonkam ia kane ka pisa ba pynlut bai bording naka bynta ka bha ka miat ka imlang sahlang bad ki nongshongshnong kiba duk”.
U Myntri Rangbah ula ban jur ia ka jingdonkam ba baroh ki Ophis Sorkar kin pyndonkam noh da ka solar eneygy ka ban iaid da ka phase. Ha kaba nyngkong, ula kyntu ia ki Medical College bad ki University ban pyndonkam noh da ka solar energy.
U Himanta ula pyntip ruh ba naduh ka 1 tarik Naitung, ka jingai bording ei sha ki Iingsah jong u Myntri Rangbah ka Jylla, ki Myntri Sorkar bad ki Heh Ophisar kan kut noh bad baroh kin hap ban siew noh ia ka bai bording.
