Guwahati, Jymmang 19 : Ha ka jingiakhun ban pynduhjait ia ka kam khaii tiar jot ba be-ain, ki Pulit ka Guwahati kila ioh ban kurup ia ki tiar ba shu tuh, kiba shongdor kumba T.12 klur ha ka jingkhynra hynnin ka sngi U Blei na ki lai tylli ki jaka lum tiar jot ha ka thain Birubari.
Haba shimkhia ban tohkit ia lai tylli ki jingujor-kynthup kawei na ka District Library ba iadei bad ka jingshah tuh ki waiar tama, ki Pulit kila pynlong ia ka jingkhynra kaba jur ha ka por 4 baje janmiet.
“Ngi la iohpdiang ia ki jingjor halor ki tiar tuh kynthup ki sainar tama bad ki tiar kali. Halor ki jingtip kiba ngi ioh, ngi la khynra ha lai tylli ki jaka lum tiar jot ha Birubari” ong uwei u ADCP Sambhavi Mishra.
Ki Pulit kila ioh kurup haduh 2000 kilo ka tama, 7000 kilo ka rynnong, 100 kilo ka nar, 2500 kilo ka air conditional condenser bad bun bah ki tiar kali bad artylli ki battery.
U briew uba la suba jur ba u dei u trai jong kawei na kine ki jaka lum tiar jot ba kyrteng u Montu Ali, ula phet krad bad jah rngai.
U Montu Ali u dei uba sah ha Hajo bad ki Pulit ki suba ba une u briew ula rieh ha Hajo. Ka jingthwet mynta ia une u briew kala iaid shaid shaid.
Ki Pulit ki suba jur ba kine ki tiar tuh ki dei lehse kiba wanrah ruh na ki Jylla ba marjan khamtam ki tiar kali bad ki briew ba pyniaid iew ia ki, ki lah ban don jingiadei wat ia ki briew na Delhi bad na kiwei ki thain.
“Ka jingtohkit kala nang iaid. Kawei pat ka sienjam ba ngin shim ka long ban ithuh ia baroh ki dkhot jong ka kynhun ki runar kiba donkti bad ban wad ia ki tynrai nangno kine ki tiar tuh ki wan poi” ong u Mishra.
