Guwahati, K’lyngkot 18 : Ki Pulit ka Assam kila ioh ban kurup ia bun bah ki tiar shna bomb ha ka sngi Balang ha Goalpara, kaba jia ruh tang da ki sngi sha ka jingrakhe Republic Day.
Palat 2000 tylli ki gelatine stick, 1800 tylliki detonator bad phra song ki blasting wire bad uwei u battery lah ioh ban kurup.
Hadien ka jingioh ia ka khubor ba thikna, ka kynhun ki Pulit ka Dhupdhara Police Station jong ka Goalpara District, kila pynlong ia ka jingapktem bad jingtalasi kali kaba jur ha surok National Highway-17. La ong ba ha kane ka jingapktem, kawei ka kali kala rat ia ka jingpynap ki Pulit da ka jingthmu ban phet krad.
Ki Pulit kila beh kthong ia kane ka kali bad hadien katto katne por, kila lap ba ki briew ba shong ha kane ka kali, kila ieh noh shadien ia kane ka kali ha kawei ka jaka.
Ki Pulit kila talasi ia kane ka kali bad ioh kurup ia kitei ki tiar shna bomb. Ka jingthwet ia ki briew kala iaid shakhmat.
