Guwahati, Jylliew 7: Ka Narcotics Control Bureau, Guwahati hynne ka sngi kala ioh ban kurup haduh 2126.660 kilo u ganja ha ryngkat bad ka trok ha Guwahati.
“Kawei ka trok bala pynthikna kat kum ki khubor syntiat, kala wan na ka thain Jorabat jong ka Meghalaya shaphang ka Khanapara, Guwahati. Ka NCB Guwahati Zonal Unit kala bat ia kane ka trok bad lam sha ka jingioh kurup haduh 2126.660 kilo u ganja lem bad ka trok. Uwei u briew ba kyrteng u Parma Ram Bishnoi ba na Rajasthan ula shah kem” ong ka NCB ha ka kyrwoh.
Ha ka jingtohkit la lap ba une u ganja ula wan na Agartala (Tripura) bad la thmu ban pynpoi sha Coochbehar, West Bengal bad ruh sha Bihar.
Ka khubor ka onng ba ki nongkhaii ganja kila pyndonkam ia ka Assam ban khaii ia u ganja na Tripura bad Mizoram.
“Ngin iai bteng ban iakhun pyrshah ia u droks. Haduh mynta ngi la ioh ban kurup bun bah ki jingdih pynbuaid” ong ki Heh Pulit.
