Yn pyndon burom ka Delhi ia u Bodfa Upendra Nath Brahma da ka surok
Guwahati, Lber 16: U Myntri Kam Pohiing ka Ri u Amit Shah ula pynpaw ba u iengskhem halor ka jingkular jong ka sorkar kaba ialam da u Narendra Modi ban pyntreikam pura ia ka Bodoland Territorial Region (BTR) Peace Accord hapoh jong kine ki 2 snem kiban wan.
Haba kren ha ka 57th Annual Conference jongka All Bodo Students’ Union (ABSU) ha Kokrajhar, u Amit Shah ula iaroh ia ka rukom treikam jongka ABSU ha kaban wanrah ia ka jingsuk bad ia ka roi ka par ha ka Bodoland.
Kum shi bynta ban ai jingithuh ia ka jingnoh synniang u nongialam jong ki Bodo u Upendra Nath Brahma, u Amit Shah ula pynbna ba yn ai kyrteng ia kawei ka surok kaba kongsan ha Delhi ha ka kyrteng Bodofa Upendra Nath Brahma Marg. Nalor kane yn plie ruh ia u mot sahnam jong une u nongialam ha Delhi ha u Iaiong bad u Amit Shah ula ong ba ka sorkar u Modi ka iengskhem bad ka jingiohi jngai ka jong u Brahma na ka bynta ka Bodoland.
U Shah ula pynpaw ruh ia ka jingjop jong ka sorkar kaban pyntreikam 82% ia ka BTR Peace Accord, kaba la iasoi ha ka 27 tarik u Kyllalyngkot 2020, watla kala don ka jingpyrshah na ki seng sain pyrthei kiba don ha ka Liang Pyrshah bad ula pynthikna ba ia ki jingkular kiba dang sah, yn ialeh ban pyndep ha kine ki 2 snem kiban wan ban don ia ka jingsuk kaba neh shi rta ha ka thain bad ula ong ruh, ba ka Armed Forces (Special Powers) Act (AFSPA) la dep ban weng noh ha ki jaka baroh kawei jong ka BTR ha ka 1 tarik u Iaiong 2022 kum shi bynta jong ka jingiasoi ia ka soskular iasuk.
U Amit Shah ula iaroh ruh ia ka jingkiew ka ioh ka kot ha ka Bodoland, da kaba pynpaw ia ka jingkynthup ia ka Kokrajhar Mushroom na Bodoland ha ki Hotel kiba don ha Delhi hapoh jongka ‘One District, One Product’ (ODOP) bad ula pynpaw ruh, ba ka Bodoland kala lah ruh ban pynlong ia ka Durand Cup kaba jop, kaba pyni shai kdar ia ka jingshisha ba la lah ban pynneh ia ka shongsuk shongsain ha ka thain.
Ula pynpaw ruh ba kiba bun ki mar kiba la pynmih na Bodoland kila ioh ia ka shap Geographical Indication (GI) Tag, kaba la kyntiew shuh shuh ia ki karkhana ha ka thain, ia kaba la tip ia ka thain kum ka jaka ka bym don ka jingsuk hynrei ka Bodoland mynta, kala kylla kum ka jakapdeng jong ka pule puthi, ka roi ka par bad ka jingmih jong ki karkhana.
U Amit Shah ula banjur ia ka jingtrei shitom ban pyniasoh noh ia ki kynhun kieng atiar sha ki Society bad ula pynpaw ba la pynlut T.287 Klur kum ka jingai jingiarap ia ki 4,881 ngut ki dkhot jongka National Democratic Front of Boroland (NDFB) bad 90% na katei ka jingai jingiarap kadei kaba la bei da ka sorkar haka jingialam u Narendra Modi. Nalor kane 400 ngut ki samla Bodo kila ioh ban rungkam ha ka Assam Commando Battalion.
U Amit Shah ula kyntu ia ki samla Bodo ba kin pynkhreh bha ialade na ka bynta ka Olympic kaban long ha u snem 2036 bad ula pynpaw ia ka jingkyrmen halor ka jingdon sap ka jongki bad ula iathuh ruh ba u Myntri Rangbahduh ka ri u Modi bad u Myntri Rangbah ka Assam u Himanta Biswa Sarma, kin pynkhreh ban wanrah haduh T.5 Lak Klur sha Assam, kaban nang kyntiew shuh shuh ia ka lad iohkam iohjam.
Haba kren ha ka jingialang, u Myntri Rangbah ka Assam u Himanta Biswa Sarma ula ong, ba ka sorkar ka iengskhem ha kaban kyntiew ia ka roi ka par jong ka Bodoland.
“Ki jaidbynriew Bodo kidei shi bynta jong ka kolshor ba riewspah ka jylla Assam. Ngi iengskhem ban pynurlong ia ki jingiohi jngai jong u Bodofa Upendra Nath Brahma da kaba pynkhlain ha ka pule puthi bad ki jingtei bapher bapher ha ka thain. Bun ki jingtei kiba thymmai kiba kynthup ia ki skulbah ki dang don hapdeng jong ka jingtei bad yn tei ruh ia ka Medical College ha Kokrajhar hapoh jong kine ki 3 snem kiban wan. Nalor kane, la dep ruh ban bhah 35 tylli ki higher secondary school ha Bodoland” la ong u Sarma.
U Sarma ula pynbna ruh ba yn rakhe pyndon burom ia ka lyngkhuh sngikha jongu Bodofa bad yn ai jingithuh kyrpang ia ki jaidbynriew Bodo kiba la wanrah nam bad jingjop, da kaba ai iaka State Award ha ka lyngkhuh sngi iap jong une u nongailam ki Bodo.
“Hapoh ka jingialam jong u Myntri Rangbahduh ka ri u Narendra Modi bad u Myntri Kam pohiing ka ri u Amit Shah, ngi iengskhem ban pynneh pynsah ia ka shongsuk, shongsain bad ban kyntiew ia ka roi ka par ha ka thain BTR” ula ong.
